Wycliffe Bible
1380 by John Wycliffe
Tit 1:1 Poul, the seruaunt of God, and apostle of Jhesu Crist, bi the feith of the chosun of God, and bi the knowing of the treuthe,
Tit 1:2 whiche is aftir pitee, in to the hope of euerlastinge lijf, which lijf God that lieth not, bihiyte bifore tymes of the world;
Tit 1:3 but he hath schewid in hise tymes his word in preching, that is bitakun to me bi the comaundement of `God oure sauyour,
Tit 1:4 to Tite, most dereworthe sone bi the comyn feith, grace and pees of God the fadir, and of Crist Jhesu, oure sauyour.
Tit 1:5 For cause of this thing Y lefte thee at Crete, that thou amende tho thingis that failen, and ordeyne preestis bi citees, as also Y disposide to thee.
Tit 1:6 If ony man is withoute cryme, an hosebonde of o wijf, and hath feithful sones, not in accusacioun of letcherie, or not suget.
Tit 1:7 For it bihoueth a bischop to be without cryme, a dispendour of God, not proud, not wrathful, not drunkelew, not smytere, not coueytouse of foul wynnyng;
Tit 1:8 but holdinge hospitalite, benygne, prudent, sobre, iust,
Tit 1:9 hooli, contynent, takinge that trewe word, that is aftir doctryn; that he be miyti to amoneste in hoolsum techyng, and to repreue hem that ayenseien.
Tit 1:10 For ther ben many vnobedient, and veyn spekeris, and disseyueris, moost thei that ben of circumcisyoun,
Tit 1:11 whiche it bihoueth to be repreued; whiche subuerten alle housis, techinge whiche thingis it bihoueth not, for the loue of foul wynnyng.
Tit 1:12 And oon of hem, her propre profete, seide, Men of Crete ben euere more lyeris, yuele beestis, of slowe wombe.
Tit 1:13 This witnessyng is trewe. For what cause blame hem sore, that thei be hool in feith,
Tit 1:14 not yyuynge tent to fablis of Jewis, and to maundementis of men, that turnen awei hem fro treuthe.
Tit 1:15 And alle thingis ben clene to clene men; but to vnclene men and to vnfeithful no thing is clene, for the soule and conscience of hem ben maad vnclene.
Tit 1:16 Thei knoulechen that thei knowen God, but bi dedis thei denyen; whanne thei ben abhominable, and vnbileueful, and repreuable to al good werk.
Tit 2:1 But speke thou tho thingis that bisemen hoolsum teching;
Tit 2:2 that elde men be sobre, chast, prudent, hool in feith, in loue, and pacience;
Tit 2:3 also olde wymmen in hooli abite, not sclaundereris, not seruynge myche to wyn, wel techynge, that thei teche prudence.
Tit 2:4 Moneste thou yonge wymmen, that thei loue here hosebondis, that thei loue her children;
Tit 2:5 and that thei be prudent, chast, sobre, hauynge cure of the hous, benygne, suget to her hosebondis, that the word of God be not blasfemyd.
Tit 2:6 Also moneste thou yonge men, that thei be sobre.
Tit 2:7 In alle thingis yyue thi silf ensaumple of good werkis, in teching, in hoolnesse, in sadnesse.
Tit 2:8 An hoolsum word, and vnrepreuable; that he that is of the contrarie side, be aschamed, hauynge noon yuel thing to seie of you.
Tit 2:9 Moneste thou seruauntis to be suget to her lordis; in alle thingis plesinge, not ayenseiynge, not defraudynge,
Tit 2:10 but in alle thingis schewinge good feith, that thei onoure in alle thingis the doctryn of `God, oure sauyour.
Tit 2:11 For the grace of `God, oure sauyour,
Tit 2:12 hath apperid to alle men, and tauyte vs, that we forsake wickidnesse, and worldli desyris, lyue sobreli, and iustli, `and piteuousli in this world,
Tit 2:13 abidinge the blessid hope and the comyng of the glorie of the greet God, and of oure sauyour Jhesu Crist;
Tit 2:14 that yaf hym silf for vs, to ayenbie vs fro al wickidnesse, and make clene to hym silf a puple acceptable, and suere of good werkis.
Tit 2:15 Speke thou these thingis, and moneste thou, and repreue thou with al comaundement; no man dispise thee.
Tit 3:1 Amoneste hem to be sugetis to prynces, and to poweris; to obeische to that that is seid, and to be redi to al good werk;
Tit 3:2 to blasfeme no man, to be not ful of chiding, but temperat, schewynge al myldenesse to alle men.
Tit 3:3 For we weren sum tyme vnwise, vnbileueful, errynge, and seruynge to desiris, and to dyuerse lustis, doynge in malice and enuye, worthi to be hatid, hatinge ech othere.
Tit 3:4 But whanne the benygnyte and the manhed of oure sauyour God aperide,
Tit 3:5 not of werkis of riytwisnesse that we diden, but bi his merci he made vs saaf, bi waischyng of ayen bigetyng, and ayen newyng of the Hooli Goost,
Tit 3:6 whom he schedde into vs plenteuousli bi Jhesu Crist,
Tit 3:7 oure saueour, that we iustified bi his grace, ben eiris by hope of euerlastinge lijf.
Tit 3:8 A trewe word is, and of these thingis Y wole that thou conferme othere, that thei that bileuen to God, be bisy to be aboue othere in good werkis. These thingis ben good, and profitable to men.
Tit 3:9 And eschewe thou foltische questiouns, and genologies, and stryues, and fiytyngis of the lawe; for tho ben vnprofitable and veyn.
Tit 3:10 Eschewe thou a man eretik, aftir oon and the secound correccioun;
Tit 3:11 witinge that he that is siche a maner man is subuertid, and trespassith, and is dampned bi his owne dom.
Tit 3:12 Whanne Y sende to thee Arteman, or Titicus, hiy thou to `come to me to Nycopolis; for Y haue purposid to dwelle in wyntir there.
Tit 3:13 Bisili byfor sende Zenam, a wise man of lawe, and Apollo, that no thing faile to hem.
Tit 3:14 Thei that ben of ouris, lerne to be gouernouris in good werkis, to necessarie vsis, that thei be not with out fruyt.
Tit 3:15 Alle men that ben with me greeten thee wel. Grete thou wel hem, that louen vs in feith. The grace of God be with you alle. Amen.
