Wycliffe Bible
1380 by John Wycliffe
Psa 1:1 Blessid is the man, that yede not in the councel of wickid men; and stood not in the weie of synneris, and sat not in the chaier of pestilence.
Psa 1:2 But his wille is in the lawe of the Lord; and he schal bithenke in the lawe of hym dai and nyyt.
Psa 1:3 And he schal be as a tree, which is plauntid bisidis the rennyngis of watris; which tre schal yyue his fruyt in his tyme. And his leef schal not falle doun; and alle thingis which euere he schal do schulen haue prosperite.
Psa 1:4 Not so wickid men, not so; but thei ben as dust, which the wynd castith awei fro the face of erthe.
Psa 1:5 Therfor wickid men risen not ayen in doom; nethir synneres in the councel of iust men.
Psa 1:6 For the Lord knowith the weie of iust men; and the weie of wickid men schal perische.
Psa 2:1 Whi gnastiden with teeth hethene men; and puplis thouyten veyn thingis?
Psa 2:2 The kyngis of erthe stoden togidere; and princes camen togidere ayens the Lord, and ayens his Crist?
Psa 2:3 Breke we the bondis of hem; and cast we awei the yok of hem fro vs.
Psa 2:4 He that dwellith in heuenes schal scorne hem; and the Lord schal bimowe hem.
Psa 2:5 Thanne he schal speke to hem in his ire; and he schal disturble hem in his stronge veniaunce.
Psa 2:6 Forsothe Y am maad of hym a kyng on Syon, his hooli hil; prechynge his comaundement.
Psa 2:7 The Lord seide to me, Thou art my sone; Y haue gendrid thee to dai.
Psa 2:8 Axe thou of me, and Y schal yyue to thee hethene men thin eritage; and thi possessioun the termes of erthe.
Psa 2:9 Thou schalt gouerne hem in an yrun yerde; and thou schalt breke hem as the vessel of a pottere.
Psa 2:10 And now, ye kyngis, vndurstonde; ye that demen the erthe, be lerud.
Psa 2:11 Serue ye the Lord with drede; and make ye ful ioye to hym with tremblyng.
Psa 2:12 Take ye lore; lest the Lord be wrooth sumtyme, and lest ye perischen fro iust waie.
Psa 2:13 Whanne his `ire brenneth out in schort tyme; blessed ben alle thei, that tristen in hym.
Psa 3:1 The title of the thridde salm. `The salm of Dauid, whanne he fledde fro the face of Absolon, his sone.
Psa 3:2 Lord, whi ben thei multiplied that disturblen me?
Psa 3:3 many men rysen ayens me. Many men seien of my soule, Noon helthe is to hym in his God.
Psa 3:4 But thou, Lord, art myn vptakere; my glorye, and enhaunsyng myn heed.
Psa 3:5 With my vois Y criede to the Lord; and he herde me fro his hooli hil.
Psa 3:6 I slepte, and `was quenchid, and Y roos vp; for the Lord resseyuede me.
Psa 3:7 I schal not drede thousyndis of puple cumpassynge me; Lord, rise thou vp; my God, make thou me saaf.
Psa 3:8 For thou hast smyte alle men beynge aduersaries to me with out cause; thou hast al to-broke the teeth of synneris.
Psa 3:9 Helthe is of the Lord; and thi blessyng, Lord, is on thi puple.
Psa 4:1 The title of the fourthe salm. `To the victorie in orguns; the salm of Dauid.
Psa 4:2 Whanne Y inwardli clepid, God of my riytwisnesse herde me; in tribulacioun thou hast alargid to me.
Psa 4:3 Haue thou mercy on me; and here thou my preier. Sones of men, hou long ben ye of heuy herte? whi louen ye vanite, and seken a leesyng?
Psa 4:4 And wite ye, that the Lord hath maad merueilous his hooli man; the Lord schal here me, whanne Y schal crye to hym.
Psa 4:5 Be ye wrothe, and nyle ye do synne; `and for tho thingis whiche ye seien in youre hertis and in youre beddis, be ye compunct.
Psa 4:6 Sacrifie ye `the sacrifice of riytfulnesse, and hope ye in the Lord; many seien, Who schewide goodis to vs?
Psa 4:7 Lord, the liyt of thi cheer is markid on vs; thou hast youe gladnesse in myn herte.
Psa 4:8 Thei ben multiplied of the fruit of whete, and of wyn; and of her oile.
Psa 4:9 In pees in the same thing; Y schal slepe, and take reste.
Psa 4:10 For thou, Lord; hast set me syngulerli in hope.
Psa 5:1 The title of the fyuethe salm. To the ouercomere on the eritagis, the song of Dauid.
Psa 5:2 Lord, perseyue thou my wordis with eeris; vndurstonde thou my cry.
Psa 5:3 Mi kyng, and my God; yyue thou tent to the vois of my preier.
Psa 5:4 For, Lord, Y schal preie to thee; here thou eerly my vois.
Psa 5:5 Eerli Y schal stonde nyy thee, and Y schal se; for thou art God not willynge wickidnesse.
Psa 5:6 Nethir an yuel willid man schal dwelle bisidis thee; nethir vniust men schulen dwelle bifor thin iyen.
Psa 5:7 Thou hatist alle that worchen wickidnesse; thou schalt leese alle that speken leesyng. The Lord schal holde abhomynable a manquellere, and gileful man.
Psa 5:8 But, Lord, in the multitude of thi merci Y schal entre in to thin hows; Y schal worschipe to thin hooli temple in thi drede.
Psa 5:9 Lord, lede thou forth me in thi riytfulnesse for myn enemyes; dresse thou my weie in thi siyt.
Psa 5:10 For whi treuthe is not in her mouth; her herte is veyn.
Psa 5:11 Her throte is an opyn sepulcre, thei diden gilefuli with her tungis; God, deme thou hem. Falle thei doun fro her thouytis, vp the multitude of her wickidnessis caste thou hem doun; for, Lord, thei han terrid thee to ire. And alle that hopen in thee, be glad; thei schulen make fulli ioye with outen ende, and thou schalt dwelle in hem.
Psa 5:12 And alle that louen thi name schulen haue glorie in thee;
Psa 5:13 for thou schalt blesse a iust man. Lord, thou hast corouned vs, as with the scheeld of thi good wille.
Psa 6:1 The title of the sixte salm. To the ouercomere in salmes, the salm of Dauid, `on the eiythe.
Psa 6:2 Lord, repreue thou not me in thi stronge veniaunce; nether chastice thou me in thin ire.
Psa 6:3 Lord, haue thou merci on me, for Y am sijk; Lord, make thou me hool, for alle my boonys ben troblid.
Psa 6:4 And my soule is troblid greetli; but thou, Lord, hou long?
Psa 6:5 Lord, be thou conuertid, and delyuere my soule; make thou me saaf, for thi merci.
Psa 6:6 For noon is in deeth, which is myndful of thee; but in helle who schal knouleche to thee?
Psa 6:7 I traueilide in my weilyng, Y schal waische my bed bi ech nyyt; Y schal moiste, `ether make weet, my bedstre with my teeris.
Psa 6:8 Myn iye is disturblid of woodnesse; Y waxe eld among alle myn enemyes.
Psa 6:9 Alle ye that worchen wickidnesse, departe fro me; for the Lord hath herd the vois of my wepyng.
Psa 6:10 The Lord hath herd my bisechyng; the Lord hath resseyued my preier.
Psa 6:11 Alle my enemyes be aschamed, and be disturblid greetli; be thei turned togidere, and be thei aschamed ful swiftli.
Psa 7:1 The title of the seuenthe salm. For the ignoraunce of Dauid, which he songe to the Lord on the wordis of Ethiopien, the sone of Gemyny.
Psa 7:2 Mi Lord God, Y haue hopid in thee; make thou me saaf fro alle that pursuen me, and delyuere thou me.
Psa 7:3 Lest ony tyme he as a lioun rauysche my soule; the while noon is that ayenbieth, nether that makith saaf.
Psa 7:4 Mi Lord God, if Y dide this thing, if wickidnesse is in myn hondis;
Psa 7:5 if Y `yeldide to men yeldynge to me yuels, falle Y `bi disseruyng voide fro myn enemyes;
Psa 7:6 myn enemy pursue my soule, and take, and defoule my lijf in erthe; and brynge my glorie in to dust.
Psa 7:7 Lord, rise thou vp in thin ire; and be thou reysid in the coostis of myn enemyes.
Psa 7:8 And, my Lord God, rise thou in the comaundement, which thou `hast comaundid; and the synagoge of puplis schal cumpasse thee.
Psa 7:9 And for this go thou ayen an hiy; the Lord demeth puplis. Lord, deme thou me bi my riytfulnesse; and bi myn innocence on me.
Psa 7:10 The wickidnesse of synneris be endid; and thou, God, sekyng the hertis and reynes, schalt dresse a iust man.
Psa 7:11 Mi iust help is of the Lord; that makith saaf riytful men in herte.
Psa 7:12 The Lord is a iust iuge, stronge and pacient; whether he is wrooth bi alle daies?
Psa 7:13 If ye ben `not conuertid, he schal florische his swerd; he hath bent his bouwe, and made it redi.
Psa 7:14 And therynne he hath maad redi the vessels of deth; he hath fulli maad his arewis with brennynge thingis.
Psa 7:15 Lo! he conseyuede sorewe; he peynfuli brouyte forth vnriytfulnesse, and childide wickidnesse.
Psa 7:16 He openide a lake, and diggide it out; and he felde in to the dich which he made.
Psa 7:17 His sorewe schal be turned in to his heed; and his wickidnesse schal come doun in to his necke.
Psa 7:18 I schal knouleche to the Lord bi his riytfulnesse; and Y schal synge to the name of the hiyeste Lord.
Psa 8:1 The title of the eiythe salm. To the ouercomere, for pressours, the salm of Dauid.
Psa 8:2 Lord, thou art oure Lord; thi name is ful wonderful in al erthe. For thi greet doyng is reisid, aboue heuenes.
Psa 8:3 Of the mouth of yonge children, not spekynge and soukynge mylk, thou madist perfitli heriyng, for thin enemyes; that thou destrie the enemy and avengere.
Psa 8:4 For Y schal se thin heuenes, the werkis of thi fyngris; the moone and sterris, whiche thou hast foundid.
Psa 8:5 What is a man, that thou art myndeful of hym; ethir the sone of a virgyn, for thou visitist hym?
Psa 8:6 Thou hast maad hym a litil lesse than aungels; thou hast corouned hym with glorie and onour,
Psa 8:7 and hast ordeyned hym aboue the werkis of thin hondis.
Psa 8:8 Thou hast maad suget alle thingis vndur hise feet; alle scheep and oxis, ferthermore and the beestis of the feeld;
Psa 8:9 the briddis of the eir, and the fischis of the see; that passen bi the pathis of the see.
Psa 8:10 Lord, `thou art oure Lord; thi name `is wondurful in al erthe.
Psa 9:1 The title of the nynthe salm. In to the ende, for the pryuytees of the sone, the salm of Dauid.
Psa 9:2 Lord, Y schal knouleche to thee in al myn herte; Y schal telle alle thi merueils.
Psa 9:3 Thou hiyeste, Y schal be glad, and Y schal be fulli ioieful in thee; Y schal synge to thi name.
Psa 9:4 For thou turnest myn enemy abac; thei schulen be maad feble, and schulen perische fro thi face.
Psa 9:5 For thou hast maad my doom and my cause; thou, that demest riytfulnesse, `hast set on the trone.
Psa 9:6 Thou blamedist hethene men, and the wickid perischide; thou hast do awei the name of hem in to the world, and in to the world of world.
Psa 9:7 The swerdis of the enemy failiden in to the ende; and thou hast distried the citees of hem. The mynde of hem perischide with sown;
Psa 9:8 and the Lord dwellith with outen ende. He made redi his trone in doom; and he schal deme the world in equite,
Psa 9:9 he schal deme puplis in riytfulnesse.
Psa 9:10 And the Lord is maad refuyt, `ether help, `to a pore man; an helpere in couenable tymes in tribulacioun.
Psa 9:11 And thei, that knowen thi name, haue hope in thee; for thou, Lord, hast not forsake hem that seken thee.
Psa 9:12 Synge ye to the Lord, that dwellith in Syon; telle ye hise studyes among hethene men.
Psa 9:13 God foryetith not the cry of pore men; for he hath mynde, and sekith the blood of hem.
Psa 9:14 Lord, haue thou merci on me; se thou my mekenesse of myn enemyes.
Psa 9:15 Which enhaunsist me fro the yatis of deeth; that Y telle alle thi preisyngis in the yatis of the douyter of Syon.
Psa 9:16 Y schal `be fulli ioyeful in thin helthe; hethene men ben fast set in the perisching, which thei maden. In this snare, which thei hidden, the foot of hem is kauyt.
Psa 9:17 The Lord makynge domes schal be knowun; the synnere is takun in the werkis of hise hondis.
Psa 9:18 Synneris be turned togidere in to helle; alle folkis, that foryeten God.
Psa 9:19 For the foryetyng of a pore man schal not be in to the ende; the pacience of pore men schal not perische in to the ende.
Psa 9:20 Lord, rise thou vp, a man be not coumfortid; folkis be demyd in thi siyt.
Psa 9:21 Lord, ordeine thou a lawe makere on hem; wite folkis, that thei ben men.
Psa 9:22 Lord, whi hast thou go fer awei? thou dispisist `in couenable tymes in tribulacioun.
Psa 9:23 While the wickid is proud, the pore man is brent; thei ben taken in the counsels, bi whiche thei thenken.
Psa 9:24 Forwhi the synnere is preisid in the desiris of his soule; and the wickid is blessid.
Psa 9:25 The synnere `wraththide the Lord; vp the multitude of his ire he schal not seke.
Psa 9:26 God is not in his siyt; hise weies ben defoulid in al tyme. God, thi domes ben takun awei fro his face; he schal be lord of alle hise enemyes.
Psa 9:27 For he seide in his herte, Y schal not be moued, fro generacioun in to generacioun without yuel.
Psa 9:28 `Whos mouth is ful of cursyng, and of bitternesse, and of gyle; trauel and sorewe is vndur his tunge.
Psa 9:29 He sittith in aspies with ryche men in priuytees; to sle the innocent man.
Psa 9:30 Hise iyen biholden on a pore man; he settith aspies in hid place, as a lioun in his denne. He settith aspies, for to rauysche a pore man; for to rauysche a pore man, while he drawith the pore man.
Psa 9:31 In his snare he schal make meke the pore man; he schal bowe hym silf, and schal falle doun, whanne he hath be lord of pore men.
Psa 9:32 For he seide in his herte, God hath foryete; he hath turned awei his face, that he se not in to the ende.
Psa 9:33 Lord God, rise thou vp, and thin hond be enhaunsid; foryete thou not pore men.
Psa 9:34 For what thing terride the wickid man God to wraththe? for he seide in his herte, God schal not seke.
Psa 9:35 Thou seest, for thou biholdist trauel and sorewe; that thou take hem in to thin hondis. The pore man is left to thee; thou schalt be an helpere to the fadirles and modirles.
Psa 9:36 Al to-breke thou the arme of the synnere, and yuel willid; his synne schal be souyt, and it schal not be foundun.
Psa 9:37 The Lord schal regne with outen ende, and in to the world of world; folkis, ye schulen perische fro the lond of hym.
Psa 9:38 The Lord hath herd the desir of pore men; thin eere hath herd the makyng redi of her herte.
Psa 9:39 To deme for the modirles `and meke; that a man `leie to no more to `magnyfie hym silf on erthe.
Psa 10:1 The title of the tenthe salm. To the victorie of Dauid.
Psa 10:2 I triste in the Lord; hou seien ye to my soule, Passe thou ouere in to an hil, as a sparowe doith?
Psa 10:3 For lo! synneris han bent a bouwe; thei han maad redi her arowis in an arowe caas; `for to schete in derknesse riytful men in herte.
Psa 10:4 For thei han distryed, whom thou hast maad perfit; but what dide the riytful man?
Psa 10:5 The Lord is in his hooli temple; he is Lord, his seete is in heuene. Hise iyen biholden on a pore man; hise iyelidis axen the sones of men.
Psa 10:6 The Lord axith a iust man, and vnfeithful man; but he, that loueth wickidnesse, hatith his soule.
Psa 10:7 He schal reyne snaris on `synful men; fier, brymston, and the spirit of tempestis ben the part of the cuppe of hem.
Psa 10:8 For the Lord is riytful, and louede riytfulnessis; his cheer siy equite, `ethir euennesse.
Psa 11:1 The title of the eleuenthe salm. To the victorie on the eiyte, the song of Dauid.
Psa 11:2 Lord, make thou me saaf, for the hooli failide; for treuthis ben maad litle fro the sones of men.
Psa 11:3 Thei spaken veyn thingis, ech man to hys neiybore; thei han gileful lippis, thei spaken in herte and herte.
Psa 11:4 The Lord destrie alle gileful lippis; and the greet spekynge tunge.
Psa 11:5 Whiche seiden, We schulen magnyfie oure tunge, our lippis ben of vs; who is oure lord?
Psa 11:6 For the wretchednesse of nedy men, and for the weilyng of pore men; now Y schal ryse vp, seith the Lord. I schal sette inhelt he; Y schal do tristili in hym.
Psa 11:7 The spechis of the Lord ben chast spechis; siluer examynyd bi fier, preued fro erthe, purgid seuen fold.
Psa 11:8 Thou, Lord, schalt kepe vs; and thou `schalt kepe vs fro this generacioun with outen ende.
Psa 11:9 Wickid men goen in cumpas; bi thin hiynesse thou hast multiplied the sones of men.
Psa 12:1 <The title of the twelfthe salm. To the victorie of Dauid.> Lord, hou long foryetist thou me in to the ende? hou long turnest thou awei thi face fro me?
Psa 12:2 Hou long schal Y sette counsels in my soule; sorewe in my herte bi dai?
Psa 12:3 Hou long schal myn enemy be reisid on me?
Psa 12:4 My Lord God, biholde thou, and here thou me. Liytne thou myn iyen, lest ony tyme Y slepe in deth;
Psa 12:5 lest ony tyme myn enemye seie, Y hadde the maistri ayens hym. Thei, that troblen me, schulen haue ioie, if Y schal be stirid; forsothe Y hopide in thi merci.
Psa 12:6 Myn herte schal fulli haue ioie in thin helthe; Y schal synge to the Lord, that yyueth goodis to me, and Y schal seie salm to the name of the hiyeste Lord.
Psa 13:1 <The `title of the threttenthe salm. To the victorie of Dauid.> The vnwise man seide in his herte, God is not. Thei ben corrupt, and ben maad abhomynable in her studies; noon is that doith good, noon is til to oon.
Psa 13:2 The Lord bihelde fro heuene on the sones of men; that he se, if ony is vndurstondynge, ethir sekynge God.
Psa 13:3 Alle bowiden awei, togidere thei ben maad vnprofitable; noon is that doth good, noon is `til to oon. The throte of hem is an open sepulcre, thei diden gilefuli with her tungis; the venym of snakis is vndur her lippis. Whos mouth is ful of cursyng and bittirnesse; her feet ben swift to schede out blood. Sorewe and cursidnesse is in the weies of hem, and thei knewen not the weie of pees; the drede of God is not bifor her iyen.
Psa 13:4 Whether alle men that worchen wickidnesse schulen not knowe; that deuowren my puple, as mete of breed?
Psa 13:5 Thei clepeden not the Lord; thei trembliden there for dreed, where was no drede;
Psa 13:6 for the Lord is in a riytful generacioun. Thou hast schent the counsel of a pore man; for the Lord is his hope.
Psa 13:7 Who schal yyue fro Syon helthe to Israel? Whanne the Lord hath turned awei the caitifte of his puple; Jacob schal `fulli be ioiful, and Israel schal be glad.
Psa 14:1 Lord, who schal dwelle in thi tabernacle; ether who schal reste in thin hooli hil?
Psa 14:2 He that entrith with out wem; and worchith riytfulnesse.
Psa 14:3 Which spekith treuthe in his herte; which dide not gile in his tunge. Nethir dide yuel to his neiybore; and took not schenschip ayens hise neiyboris.
Psa 14:4 A wickid man is brouyt to nouyt in his siyt; but he glorifieth hem that dreden the Lord. Which swerith to his neiybore, and disseyueth not;
Psa 14:5 which yaf not his money to vsure; and took not yiftis on the innocent. He, that doith these thingis, schal not be moued with outen ende.
Psa 15:1 The title of the fiuetenthe salm. `Of the meke and symple, the salm of Dauid. Lord, kepe thou me, for Y haue hopid in thee;
Psa 15:2 Y seide to the Lord, Thou art my God, for thou hast no nede of my goodis.
Psa 15:3 To the seyntis that ben in the lond of hym; he made wondurful alle my willis in hem.
Psa 15:4 The sikenessis of hem ben multiplied; aftirward thei hastiden. I schal not gadire togidere the conuenticulis, `ethir litle couentis, of hem of bloodis; and Y schal not be myndeful of her names bi my lippis.
Psa 15:5 The Lord is part of myn eritage, and of my passion; thou art, that schalt restore myn eritage to me.
Psa 15:6 Coordis felden to me in ful clere thingis; for myn eritage is ful cleer to me.
Psa 15:7 I schal blesse the Lord, that yaf vndurstondyng to me; ferthermore and my reynes blameden me `til to nyyt.
Psa 15:8 I purueide euere the Lord in my siyt; for he is on the riythalf to me, that Y be not moued.
Psa 15:9 For this thing myn herte was glad, and my tunge ioyede fulli; ferthermore and my fleisch schal reste in hope.
Psa 15:10 For thou schalt not forsake my soule in helle; nether thou schalt yyue thin hooli to se corrupcioun. Thou hast maad knowun to me the weies of lijf; thou schalt fille me of gladnesse with thi cheer; delityngis ben in thi riythalf `til in to the ende.
Psa 16:1 The title of the sixtenthe salm. The preier of Dauid. Lord, here thou my riytfulnesse; biholde thou my preier. Perseuye thou with eeris my preier; not maad in gileful lippis.
Psa 16:2 Mi doom come `forth of thi cheer; thin iyen se equite.
Psa 16:3 Thou hast preued myn herte, and hast visitid in niyt; thou hast examynyd me bi fier, and wickidnesse is not foundun in me.
Psa 16:4 That my mouth speke not the werkis of men; for the wordis of thi lippis Y haue kept harde weies.
Psa 16:5 Make thou perfit my goyngis in thi pathis; that my steppis be not moued.
Psa 16:6 I criede, for thou, God, herdist me; bowe doun thin eere to me, and here thou my wordis.
Psa 16:7 Make wondurful thi mercies; that makist saaf `men hopynge in thee.
Psa 16:8 Kepe thou me as the appil of the iye; fro `men ayenstondynge thi riyt hond. Keuere thou me vndur the schadewe of thi wyngis;
Psa 16:9 fro the face of vnpitouse men, that han turmentid me. Myn enemyes han cumpassid my soule;
Psa 16:10 thei han closide togidere her fatnesse; the mouth of hem spak pride.
Psa 16:11 Thei castiden me forth, and han cumpassid me now; thei ordeyneden to bowe doun her iyen in to erthe.
Psa 16:12 Thei, as a lioun maad redi to prey, han take me; and as the whelp of a lioun dwellynge in hid places.
Psa 16:13 Lord, rise thou vp, bifor come thou hym, and disseyue thou hym; delyuere thou my lijf fro the `vnpitouse,
Psa 16:14 delyuere thou thi swerd fro the enemyes of thin hond. Lord, departe thou hem fro a fewe men of `the lond in the lijf of hem; her wombe is fillid of thin hid thingis. Thei ben fillid with sones; and thei leften her relifis to her litle children.
Psa 16:15 But Y in riytfulnesse schal appere to thi siyt; Y schal be fillid, whanne thi glorie schal appere.
Psa 17:1 The title of the seuenetenthe salm. To victorie, the word of the Lord to Dauid; which spak the wordis of this song, in the dai in which the Lord delyuerede hym fro the hond of alle hise enemyes, and fro the hond of Saul; and he seide:
Psa 17:2 Lord, my strengthe, Y schal loue thee; the Lord is my stidfastnesse, and my refuyt, and mi deliuerere.
Psa 17:3 Mi God is myn helpere; and Y schal hope in to hym. My defendere, and the horn of myn helthe; and myn vptakere.
Psa 17:4 I schal preise, and ynwardli clepe the Lord; and Y schal be saaf fro myn enemyes.
Psa 17:5 The sorewis of deth cumpassiden me; and the strondis of wickidnesse disturbliden me.
Psa 17:6 The sorewis of helle cumpassiden me; the snaris of deeth `bifor ocupieden me.
Psa 17:7 In my tribulacioun Y inwardli clepide the Lord; and Y criede to my God. And he herde my vois fro his hooli temple; and my cry in his siyt entride in to hise eeris.
Psa 17:8 The erthe was mouede togidere, and tremblede togidere; the foundementis of hillis weren troblid togidere, and weren moued togidere; for he was wrooth to hem.
Psa 17:9 Smoke stiede in the ire of hym, and fier brente out fro his face; coolis weren kyndlid of hym.
Psa 17:10 He bowide doun heuenes, and cam doun; and derknesse was vndur hise feet.
Psa 17:11 And he stiede on cherubym, and flei; he fley ouer the pennes of wyndis.
Psa 17:12 And he settide derknesses his hidyng place, his tabernacle `in his cumpas; derk water was in the cloudes of the lowere eir.
Psa 17:13 Ful cleer cloudis passiden in his siyt; hail and the coolis of fier.
Psa 17:14 And the Lord thundrid fro heuene; and the hiyeste yaf his vois, hail and the coolis of fier `camen doun.
Psa 17:15 And he sente hise arowis, and distriede tho men; he multipliede leytis, and disturblide tho men.
Psa 17:16 And the wellis of watris apperiden; and the foundementis of the erthe weren schewid. Lord, of thi blamyng; of the brething of the spirit of thin ire.
Psa 17:17 He sente fro the hiyeste place, and took me; and he took me fro many watris.
Psa 17:18 He delyuerede me fro my strongeste enemyes; and fro hem that hatiden me, fro thei weren coumfortid on me.
Psa 17:19 Thei camen bifor me in the dai of my turment; and the Lord was maad my defendere.
Psa 17:20 And he ledde out me in to breede; he maad me saaf, for he wolde me.
Psa 17:21 And the Lord schal yelde to me bi my riytfulnesse; and he schal yelde to me bi the clennesse of myn hondis.
Psa 17:22 For Y kepte the weies of the Lord; and Y dide not vnfeithfuli fro my God.
Psa 17:23 For alle hise domes ben in my siyt; and Y puttide not awei fro me hise riytfulnessis.
Psa 17:24 And Y schal be vnwemmed with hym; and Y schal kepe me fro my wickidnesse.
Psa 17:25 And the Lord schal yelde to me bi my riytfulnesse; and bi the clennesse of myn hondis in the siyt of hise iyen.
Psa 17:26 With the hooli, thou schalt be hooli; and with `a man innocent, thou schalt be innocent.
Psa 17:27 And with a chosun man, thou schalt be chosun; and with a weiward man, thou schalt be weiward.
Psa 17:28 For thou schalt make saaf a meke puple; and thou schalt make meke the iyen of proude men.
Psa 17:29 For thou, Lord, liytnest my lanterne; my God, liytne thou my derknessis.
Psa 17:30 For bi thee Y schal be delyuered fro temptacioun; and in my God Y schal `go ouer the wal.
Psa 17:31 Mi God, his weie is vndefoulid, the speches of the Lord ben examyned bi fier; he is defendere of alle men hopynge in hym.
Psa 17:32 For whi, who is God out takun the Lord? ethir who is God outakun oure God?
Psa 17:33 God that hath gird me with vertu; and hath set my weie vnwemmed.
Psa 17:34 Which made perfit my feet as of hertis; and ordeynynge me on hiye thingis.
Psa 17:35 Which techith myn hondis to batel; and thou hast set myn armys as a brasun bouwe.
Psa 17:36 And thou hast youe to me the kyueryng of thin helthe; and thi riythond hath vptake me. And thi chastisyng amendide me in to the ende; and thilke chastisyng of thee schal teche me.
Psa 17:37 Thou alargidist my paaces vndur me; and my steppis ben not maad vnstidefast.
Psa 17:38 Y schal pursue myn enemyes, and Y schal take hem; and Y schal not turne til thei failen.
Psa 17:39 I schal al to-breke hem, and thei schulen not mowe stonde; thei schulen falle vndur my feet.
Psa 17:40 And thou hast gird me with vertu to batel; and thou hast `supplauntid, ether disseyued, vndur me men risynge ayens me.
Psa 17:41 And thou hast youe myn enemyes abac to me; and thou hast distried `men hatynge me.
Psa 17:42 Thei crieden, and noon was that maad hem saaf; `thei crieden to the Lord, and he herde not hem.
Psa 17:43 And Y schal al to-breke hem, as dust bifor the face of wynd; Y schal do hem awei, as the cley of stretis.
Psa 17:44 Thou schalt delyuere me fro ayenseiyngis of the puple; thou schalt sette me in to the heed of folkis.
Psa 17:45 The puple, which Y knewe not, seruede me; in the herynge of eere it obeiede to me.
Psa 17:46 Alien sones lieden to me, alien sones wexiden elde; and crokiden fro thi pathis.
Psa 17:47 The Lord lyueth, and my God be blessid; and the God of myn helthe be enhaunsid.
Psa 17:48 God, that yauest veniaunces to me, and makist suget puplis vndur me; my delyuerere fro my wrathful enemyes.
Psa 17:49 And thou schalt enhaunse me fro hem, that risen ayens me; thou schalt delyuere me fro a wickid man.
Psa 17:50 Therfor, Lord, Y schal knouleche to thee among naciouns; and Y schal seie salm to thi name.
Psa 17:51 Magnyfiynge the helthis of his kyng; and doynge merci to his crist Dauid, and to his seed til in to the world.
Psa 18:1 The title of the eiytenthe salm. To victorie, the salm of Dauid.
Psa 18:2 Heuenes tellen out the glorie of God; and the firmament tellith the werkis of hise hondis.
Psa 18:3 The dai tellith out to the dai a word; and the nyyt schewith kunnyng to the nyyt.
Psa 18:4 No langagis ben, nether wordis; of whiche the voices of hem ben not herd.
Psa 18:5 The soun of hem yede out in to al erthe; and the wordis of hem `yeden out in to the endis of the world.
Psa 18:6 In the sunne he hath set his tabernacle; and he as a spouse comynge forth of his chaumbre. He fulli ioyede, as a giaunt, to renne his weie;
Psa 18:7 his goynge out was fro hiyeste heuene. And his goyng ayen was to the hiyeste therof; and noon is that hidith hym silf fro his heet.
Psa 18:8 The lawe of the Lord is with out wem, and conuertith soulis; the witnessyng of the Lord is feithful, and yyueth wisdom to litle children.
Psa 18:9 The riytfulnessis of the Lord ben riytful, gladdynge hertis; the comaundement of the Lord is cleere, liytnynge iyen.
Psa 18:10 The hooli drede of the Lord dwellith in to world of world; the domes of the Lord ben trewe, iustified in to hem silf.
Psa 18:11 Desirable more than gold, and a stoon myche preciouse; and swettere than hony and honycoomb.
Psa 18:12 `Forwhi thi seruaunt kepith thoo; myche yeldyng is in tho to be kept.
Psa 18:13 Who vndurstondith trespassis? make thou me cleene fro my priuy synnes;
Psa 18:14 and of alien synnes spare thi seruaunt. `If the forseid defautis ben not, Lord, of me, than Y schal be with out wem; and Y schal be clensid of the mooste synne.
Psa 18:15 And the spechis of my mouth schulen be, that tho plese; and the thenkynge of myn herte euere in thi siyt. Lord, myn helpere; and myn ayenbiere.
Psa 19:1 The title of the nyntenthe salm. To victorie, the salm of Dauid.
Psa 19:2 The Lord here thee in the dai of tribulacioun; the name of God of Jacob defende thee.
Psa 19:3 Sende he helpe to thee fro the hooli place; and fro Syon defende he thee.
Psa 19:4 Be he myndeful of al thi sacrifice; and thi brent sacrifice be maad fat.
Psa 19:5 Yyue he to thee aftir thin herte; and conferme he al thi counsel.
Psa 19:6 We schulen be glad in thin helthe; and we schulen be magnyfied in the name of oure God.
Psa 19:7 The Lord fille alle thin axyngis; nowe Y haue knowe, that the Lord hath maad saaf his crist. He schal here hym fro his hooly heuene; the helthe of his riyt hond is in poweris.
Psa 19:8 Thes in charis, and these in horsis; but we schulen inwardli clepe in the name of oure Lord God.
Psa 19:9 Thei ben boundun, and felden doun; but we han rise, and ben reisid.
Psa 19:10 Lord, make thou saaf the kyng; and here thou vs in the dai in which we inwardli clepen thee.
Psa 20:1 The title of the twentithe salm. To victorie, the salm of Dauid.
Psa 20:2 Lord, the kyng schal be glad in thi vertu; and he schal ful out haue ioye greetli on thin helthe.
Psa 20:3 Thou hast youe to hym the desire of his herte; and thou hast not defraudid hym of the wille of hise lippis.
Psa 20:4 For thou hast bifor come hym in the blessyngis of swetnesse; thou hast set on his heed a coroun of preciouse stoon.
Psa 20:5 He axide of thee lijf, and thou yauest to hym; the lengthe of daies in to the world, `and in to the world of world.
Psa 20:6 His glorie is greet in thin helthe; thou schalt putte glorie, and greet fayrnesse on hym.
Psa 20:7 For thou schalt yyue hym in to blessing in to the world of world; thou schalt make hym glad in ioye with thi cheer.
Psa 20:8 For the kyng hopith in the Lord; and in the merci of the hiyeste he schal not be moued.
Psa 20:9 Thyn hond be foundun to alle thin enemyes; thi riythond fynde alle hem that haten thee.
Psa 20:10 Thou schalt putte hem as a furneis of fier in the tyme of thi cheer; the Lord schal disturble hem in his ire, and fier schal deuoure hem.
Psa 20:11 Thou schalt leese the fruyt of hem fro erthe; and `thou schalt leese the seed of hem fro the sones of men.
Psa 20:12 For thei bowiden yuels ayens thee; thei thouyten counseils, whiche thei myyten not stablische.
Psa 20:13 For thou schalt putte hem abac; in thi relifs thou schalt make redi the cheer of hem.
Psa 20:14 Lord, be thou enhaunsid in thi vertu; we schulen synge, and seie opinly thi vertues.
Psa 21:1 The `title of the oon and twentithe salm. To ouercome, for `the morewtid hynd; the salm of Dauid.
Psa 21:2 God, my God, biholde thou on me, whi hast thou forsake me? the wordis of my trespassis ben fer fro myn helthe.
Psa 21:3 Mi God, Y schal crye bi dai, and thou schalt not here; and bi nyyt, and not to vnwisdom to me.
Psa 21:4 Forsothe thou, the preisyng of Israel, dwellist in holynesse;
Psa 21:5 oure fadris hopiden in thee, thei hopiden, and thou delyueridist hem.
Psa 21:6 Thei crieden to thee, and thei weren maad saaf; thei hopiden in thee, and thei weren not schent.
Psa 21:7 But Y am a worm, and not man; the schenschip of men, and the outcastyng of the puple.
Psa 21:8 Alle men seynge me scorneden me; thei spaken with lippis, and stiriden the heed.
Psa 21:9 He hopide in the Lord, delyuere he hym; make he hym saaf, for he wole hym.
Psa 21:10 For thou it art that drowist me out of the wombe, thou art myn hope fro the tetis of my modir;
Psa 21:11 in to thee Y am cast forth fro the wombe. Fro the wombe of my modir thou art my God; departe thou not fro me.
Psa 21:12 For tribulacioun is next; for noon is that helpith.
Psa 21:13 Many calues cumpassiden me; fatte bolis bisegiden me.
Psa 21:14 Thei openyden her mouth on me; as doith a lioun rauyschynge and rorynge.
Psa 21:15 I am sched out as watir; and alle my boonys ben scaterid. Myn herte is maad, as wex fletynge abrood; in the myddis of my wombe.
Psa 21:16 Mi vertu driede as a tiyl stoon, and my tunge cleuede to my chekis; and thou hast brouyt forth me in to the dust of deth.
Psa 21:17 For many doggis cumpassiden me; the counsel of wickid men bisegide me. Thei delueden myn hondis and my feet;
Psa 21:18 thei noumbriden alle my boonys. Sotheli thei lokiden, and bihelden me;
Psa 21:19 thei departiden my clothis to hem silf, and thei senten lot on my cloth.
Psa 21:20 But thou, Lord, delaie not thin help fro me; biholde thou to my defence.
Psa 21:21 God, delyuere thou my lijf fro swerd; and delyuere thou myn oon aloone fro the hond of the dogge.
Psa 21:22 Make thou me saaf fro the mouth of a lioun; and my mekenesse fro the hornes of vnycornes.
Psa 21:23 I schal telle thi name to my britheren; Y schal preise thee in the myddis of the chirche.
Psa 21:24 Ye that dreden the Lord, herie hym; alle the seed of Jacob, glorifie ye hym.
Psa 21:25 Al the seed of Israel drede hym; for he forsook not, nethir dispiside the preier of a pore man. Nethir he turnede awei his face fro me; and whanne Y criede to hym, he herde me.
Psa 21:26 Mi preisyng is at thee in a greet chirche; Y schal yelde my vowis in the siyt of men dredynge hym.
Psa 21:27 Pore men schulen ete, and schulen be fillid, and thei schulen herie the Lord, that seken hym; the hertis of hem schulen lyue in to the world of world.
Psa 21:28 Alle the endis of erthe schulen bithenke; and schulen be conuertid to the Lord. And alle the meynees of hethene men; schulen worschipe in his siyt.
Psa 21:29 For the rewme is the Lordis; and he schal be Lord of hethene men.
Psa 21:30 Alle the fatte men of erthe eeten and worschipiden; alle men, that goen doun in to erthe, schulen falle doun in his siyt.
Psa 21:31 And my soule schal lyue to hym; and my seed schal serue him.
Psa 21:32 A generacioun to comyng schal be teld to the Lord; and heuenes schulen telle his riytfulnesse to the puple that schal be borun, whom the Lord made.
Psa 22:1 The title of the two and twentithe salm. `The salm, ether the song of Dauid. The Lord gouerneth me, and no thing schal faile to me;
Psa 22:2 in the place of pasture there he hath set me. He nurschide me on the watir of refreischyng;
Psa 22:3 he conuertide my soule. He ledde me forth on the pathis of riytfulnesse; for his name.
Psa 22:4 For whi thouy Y schal go in the myddis of schadewe of deeth; Y schal not drede yuels, for thou art with me. Thi yerde and thi staf; tho han coumfortid me.
Psa 22:5 Thou hast maad redi a boord in my siyt; ayens hem that troblen me. Thou hast maad fat myn heed with oyle; and my cuppe, `fillinge greetli, is ful cleer.
Psa 22:6 And thi merci schal sue me; in alle the daies of my lijf. And that Y dwelle in the hows of the Lord; in to the lengthe of daies.
Psa 23:1 The title of the `thre and twentithe salm. The song of Dauid. The erthe and the fulnesse therof is `the Lordis; the world, and alle that dwellen therynne `is the Lordis.
Psa 23:2 For he foundide it on the sees; and made it redi on floodis.
Psa 23:3 Who schal stie in to the hil of the Lord; ethir who schal stonde in the hooli place of hym?
Psa 23:4 The innocent in hondis, and in cleene herte; whiche took not his soule in veyn, nether swoor in gile to his neiybore.
Psa 23:5 `This man schal take blessyng of the Lord; and mercy of God his helthe.
Psa 23:6 This is the generacioun of men sekynge hym; of men sekynge the face of God of Jacob.
Psa 23:7 Ye princes, take vp youre yatis, and ye euerelastynge yatis, be reisid; and the kyng of glorie schal entre.
Psa 23:8 Who is this kyng of glorie? the Lord strong and myyti, the Lord myyti in batel.
Psa 23:9 Ye princes, take vp youre yatis, and ye euerlastynge yatis, be reisid; and the kyng of glorie schal entre.
Psa 23:10 Who is this kyng of glorie? the Lord of vertues, he is the kyng of glorie.
Psa 24:1 The title of the foure and twentithe salm. To Dauid.
Psa 24:2 Lord, to thee Y haue reisid my soule; my God, Y truste in thee, be Y not aschamed.
Psa 24:3 Nethir myn enemyes scorne me; for alle men that suffren thee schulen not be schent.
Psa 24:4 Alle men doynge wickyd thingis superfluli; be schent. Lord, schewe thou thi weies to me; and teche thou me thi pathis.
Psa 24:5 Dresse thou me in thi treuthe, and teche thou me, for thou art God my sauyour; and Y suffride thee al dai.
Psa 24:6 Lord, haue thou mynde of thi merciful doyngis; and of thi mercies that ben fro the world.
Psa 24:7 Haue thou not mynde on the trespassis of my yongthe; and on myn vnkunnyngis. Thou, Lord, haue mynde on me bi thi merci; for thi goodnesse.
Psa 24:8 The Lord is swete and riytful; for this he schal yyue a lawe to men trespassynge in the weie.
Psa 24:9 He schal dresse deboner men in doom; he schal teche mylde men hise weies.
Psa 24:10 Alle the weies of the Lord ben mercy and treuthe; to men sekynge his testament, and hise witnessyngis.
Psa 24:11 Lord, for thi name thou schalt do merci to my synne; for it is myche.
Psa 24:12 Who is a man, that dredith the Lord? he ordeyneth to hym a lawe in the weie which he chees.
Psa 24:13 His soule schal dwelle in goodis; and his seed schal enerite the lond.
Psa 24:14 The Lord is a sadnesse to men dredynge hym; and his testament is, that it be schewid to hem.
Psa 24:15 Myn iyen ben euere to the Lord; for he schal breide awey my feet fro the snare.
Psa 24:16 Biholde thou on me, and haue thou mercy on me; for Y am
Psa 24:17 oon aloone and pore The tribulaciouns of myn herte ben multiplied; delyuere thou me of my nedis.
Psa 24:18 Se thou my mekenesse and my trauel; and foryyue thou alle my trespassis.
Psa 24:19 Bihold thou myn enemyes, for thei ben multiplied; and thei haten me bi wickid hatrede.
Psa 24:20 Kepe thou my soule, and delyuere thou me; be Y not aschamed, for Y hopide in thee.
Psa 24:21 Innocent men and riytful cleuyden to me; for Y suffride thee.
Psa 24:22 God, delyuere thou Israel; fro alle hise tribulaciouns.
Psa 25:1 <The title of the fyue and twentithe salm. `To Dauid.> Lord, deme thou me, for Y entride in myn innocens; and Y hopynge in the Lord schal not be made vnstidfast.
Psa 25:2 Lord, preue thou me, and asaie me; brenne thou my reynes, and myn herte.
Psa 25:3 For whi thi merci is bifor myn iyen; and Y pleside in thi treuthe.
Psa 25:4 I sat not with the counsel of vanyte; and Y schal not entre with men doynge wickid thingis.
Psa 25:5 I hatide the chirche of yuele men; and Y schal not sitte with wickid men.
Psa 25:6 I schal waische myn hondis among innocentis; and, Lord, Y schal cumpasse thin auter.
Psa 25:7 That Y here the vois of heriyng; and that Y telle out alle thi merueils.
Psa 25:8 Lord, Y haue loued the fairnesse of thin hows; and the place of the dwellyng of thi glorie.
Psa 25:9 God, leese thou not my soule with vnfeithful men; and my lijf with men of bloodis.
Psa 25:10 In whose hondis wyckidnessis ben; the riythond of hem is fillid with yiftis.
Psa 25:11 But Y entride in myn innocens; ayenbie thou me, and haue merci on me.
Psa 25:12 Mi foot stood in riytfulnesse; Lord, Y schal blesse thee in chirchis.
Psa 26:1 The title of the sixe and twentithe salm. To Dauid. The Lord is my liytnyng, and myn helthe; whom schal Y drede? The Lord is defendere of my lijf; for whom schal Y tremble?
Psa 26:2 The while noiful men neiyen on me; for to ete my fleischis. Myn enemyes, that trobliden me; thei weren maad sijk and felden doun.
Psa 26:3 Thouy castels stonden togidere ayens me; myn herte schal not drede. Thouy batel risith ayens me; in this thing Y schal haue hope.
Psa 26:4 I axide of the Lord o thing; Y schal seke this thing; that Y dwelle in the hows of the Lord alle the daies of my lijf. That Y se the wille of the Lord; and that Y visite his temple.
Psa 26:5 For he hidde me in his tabernacle in the dai of yuelis; he defendide me in the hid place of his tabernacle.
Psa 26:6 He enhaunside me in a stoon; and now he enhaunside myn heed ouer myn enemyes. I cumpasside, and offride in his tabernacle a sacrifice of criyng; Y schal synge, and Y schal seie salm to the Lord.
Psa 26:7 Lord, here thou my vois, bi which Y criede to thee; haue thou merci on me, and here me.
Psa 26:8 Myn herte seide to thee, My face souyte thee; Lord, Y schal seke eft thi face.
Psa 26:9 Turne thou not awei thi face fro me; bouwe thou not awei in ire fro thi seruaunt. Lord, be thou myn helpere, forsake thou not me; and, God, myn helthe, dispise thou not me.
Psa 26:10 For my fadir and my modir han forsake me; but the Lord hath take me.
Psa 26:11 Lord, sette thou a lawe to me in thi weie; and dresse thou me in thi path for myn enemyes.
Psa 26:12 Bitake thou not me in to the soules of hem, that troblen me; for wickid witnessis han rise ayens me, and wickydnesse liede to it silf.
Psa 26:13 I bileue to see the goodis of the Lord; in the lond of `hem that lyuen.
Psa 26:14 Abide thou the Lord, do thou manli; and thin herte be coumfortid, and suffre thou the Lord.
Psa 27:1 The title of the seuen and twentithe salm. To Dauid. Lord, Y schal crye to thee; my God, be thou not stille fro me, be thou not stille `ony tyme fro me; and Y schal be maad lijk to hem, that goen doun in to the lake.
Psa 27:2 Lord, here thou the vois of my bisechyng, while Y preie to thee; whyle Y reise myn hondis to thin hooli temple.
Psa 27:3 Bitake thou not me togidere with synneris; and leese thou not me with hem that worchen wickidnesse. Whyche speken pees with her neiybore; but yuels ben in her hertis.
Psa 27:4 Yyue thou to hem vpe the werkis of hem; and vpe the wickidnesse of her fyndyngis. Yyue thou to hem vpe the werkis of her hondis; yelde thou her yeldyng to hem.
Psa 27:5 For thei vndurstoden not the werkis of the Lord, and bi the werkis of hise hondis thou schalt destrie hem; and thou schalt not bilde hem.
Psa 27:6 Blissid be the Lord; for he herde the vois of my bisechyng.
Psa 27:7 The Lord is myn helpere and my defendere; and myn herte hopide in hym, and Y am helpid. And my fleisch flouride ayen; and of my wille Y schal knowleche to hym.
Psa 27:8 The Lord is the strengthe of his puple; and he is defendere of the sauyngis of his crist.
Psa 27:9 Lord, make thou saaf thi puple, and blesse thou thin eritage; and reule thou hem, and enhaunse thou hem til in to with outen ende.
Psa 28:1 The title of the eiyt and twentithe salm. The salm, ethir song of Dauid. Ye sones of God, brynge to the Lord; brynge ye to the Lord the sones of rammes.
Psa 28:2 Brynge ye to the Lord glorie and onour; brynge ye to the Lord glorie to his name; herie ye the Lord in his hooli large place.
Psa 28:3 The vois of the Lord on watris, God of mageste thundride; the Lord on many watris.
Psa 28:4 The vois of the Lord in vertu; the vois of the Lord in greet doyng.
Psa 28:5 The vois of the Lord brekynge cedris; and the Lord schal breke the cedris of the Liban.
Psa 28:6 And he schal al to-breke hem to dust as a calf of the Liban; and the derling was as the sone of an vnycorn.
Psa 28:7 The vois of the Lord departynge the flawme of fier;
Psa 28:8 the vois of the Lord schakynge desert; and the Lord schal stire togidere the desert of Cades.
Psa 28:9 The vois of the Lord makynge redi hertis, and he schal schewe thicke thingis; and in his temple alle men schulen seie glorie.
Psa 28:10 The Lord makith to enhabite the greet flood; and the Lord schal sitte kyng with outen ende.
Psa 28:11 The Lord schal yyue vertu to his puple; the Lord schal blesse his puple in pees.
Psa 29:1 The title of the nyne and twentithe salm. The salm of song, for the halewyng of the hows of Dauid.
Psa 29:2 Lord, Y schal enhaunse thee, for thou hast vp take me; and thou delitidist not myn enemyes on me.
Psa 29:3 Mi Lord God, Y criede to thee; and thou madist me hool.
Psa 29:4 Lord, thou leddist out my soule fro helle; thou sauedist me fro hem that goen doun into the lake.
Psa 29:5 Ye seyntis of the Lord, synge to the Lord; and knowleche ye to the mynde of his hoolynesse.
Psa 29:6 For ire is in his indignacioun; and lijf is in his wille. Wepyng schal dwelle at euentid; and gladnesse at the morewtid.
Psa 29:7 Forsothe Y seide in my plentee; Y schal not be moued with outen ende.
Psa 29:8 Lord, in thi wille; thou hast youe vertu to my fairnesse. Thou turnedist awei thi face fro me; and Y am maad disturblid.
Psa 29:9 Lord, Y schal crye to thee; and Y schal preye to my God.
Psa 29:10 What profit is in my blood; while Y go doun in to corrupcioun? Whether dust schal knouleche to thee; ethir schal telle thi treuthe?
Psa 29:11 The Lord herde, and hadde merci on me; the Lord is maad myn helpere.
Psa 29:12 Thou hast turned my weilyng in to ioye to me; thou hast to-rent my sak, and hast cumpassid me with gladnesse.
Psa 29:13 That my glorie synge to thee, and Y be not compunct; my Lord God, Y schal knouleche to thee with outen ende.
Psa 30:1 The title of the thrittithe salm. To victorie, the salm of Dauid.
Psa 30:2 Lord, Y hopide in thee, be Y not schent with outen ende; delyuere thou me in thi riytfulnesse.
Psa 30:3 Bouwe doun thin eere to me; haaste thou to delyuere me. Be thou to me in to God defendere, and in to an hows of refuyt; that thou make me saaf.
Psa 30:4 For thou art my strengthe and my refuyt; and for thi name thou schalt lede me forth, and schalt nurische me.
Psa 30:5 Thou schalt lede me out of the snare, which thei hidden to me; for thou art my defendere.
Psa 30:6 I bitake my spirit in to thin hondis; Lord God of treuthe, thou hast ayen bouyt me.
Psa 30:7 Thou hatist hem that kepen vanytees superfluli.
Psa 30:8 Forsothe Y hopide in the Lord; Y schal haue fulli ioie, and schal be glad in thi merci. For thou byheldist my mekenesse; thou sauedist my lijf fro nedis.
Psa 30:9 And thou closidist not me togidere withynne the hondis of the enemy; thou hast sett my feet in a large place.
Psa 30:10 Lord, haue thou merci on me, for Y am troblid; myn iye is troblid in ire, my soule and my wombe `ben troblid.
Psa 30:11 For whi my lijf failide in sorewe; and my yeeris in weilynges. Mi vertu is maad feble in pouert; and my boonys ben disturblid.
Psa 30:12 Ouer alle myn enemyes Y am maad schenship greetli to my neiyboris; and drede to my knowun. Thei that sien me with outforth, fledden fro me; Y am youun to foryetyng,
Psa 30:13 as a deed man fro herte. I am maad as a lorun vessel;
Psa 30:14 for Y herde dispisyng of many men dwellynge in cumpas. In that thing the while thei camen togidere ayens me; thei counceliden to take my lijf.
Psa 30:15 But, Lord, Y hopide in thee; Y seide, Thou art my God; my tymes ben in thin hondis.
Psa 30:16 Delyuer thou me fro the hondis of mynen enemyes; and fro hem that pursuen me.
Psa 30:17 Make thou cleer thi face on thi seruaunt; Lord, make thou me saaf in thi merci;
Psa 30:18 be Y not schent, for Y inwardli clepide thee. Unpitouse men be aschamed, and be led forth in to helle;
Psa 30:19 gileful lippys be maad doumbe. That speken wickidnesse ayens a iust man; in pride, and in mysusyng.
Psa 30:20 Lord, the multitude of thi swetnesse is ful greet; which thou hast hid to men dredynge thee. Thou hast maad a perfit thing to hem, that hopen in thee; in the siyt of the sones of men.
Psa 30:21 Thou schalt hide hem in the priuyte of thi face; fro disturblyng of men. Thou schalt defende hem in thi tabernacle; fro ayenseiyng of tungis.
Psa 30:22 Blessid be the Lord; for he hath maad wondurful his merci to me in a strengthid citee.
Psa 30:23 Forsothe Y seide in the passyng of my soule; Y am cast out fro the face of thin iyen. Therfor thou herdist the vois of my preier; while Y criede to thee.
Psa 30:24 Alle ye hooli men of the Lord, loue hym; for the Lord schal seke treuthe, and he schal yelde plenteuousli to hem that doen pride.
Psa 30:25 Alle ye that hopen in the Lord, do manli; and youre herte be coumfortid.
Psa 31:1 The title of the oon and thrittithe salm. Lernyng to Dauid. Blessid ben thei, whose wickidnessis ben foryouun; and whose synnes ben hilid.
Psa 31:2 Blessid is the man, to whom the Lord arrettide not synne; nethir gile is in his spirit.
Psa 31:3 For Y was stille, my boonys wexiden elde; while Y criede al dai.
Psa 31:4 For bi dai and nyyt thin `hond was maad greuouse on me; Y am turned in my wretchednesse, while the thorn is set in.
Psa 31:5 I made my synne knowun to thee; and Y hidde not my vnriytfulnesse. I seide, Y schal knouleche ayens me myn vnriytfulnesse to the Lord; and thou hast foryoue the wickidnesse of my synne.
Psa 31:6 For this thing ech hooli man schal preye to thee; in couenable tyme. Netheles in the greet flood of many watris; tho schulen not neiye to thee.
Psa 31:7 Thou art my refuyt fro tribulacioun, that cumpasside me; thou, my fulli ioiyng, delyuere me fro hem that cumpassen me.
Psa 31:8 Y schal yyue vnderstondyng to thee, and Y schal teche thee; in this weie in which thou schalt go, Y schal make stidefast myn iyen on thee.
Psa 31:9 Nile ye be maad as an hors and mule; to whiche is noon vndurstondyng. Lord, constreyne thou the chekis of hem with a bernacle and bridil; that neiyen not to thee.
Psa 31:10 Many betyngis ben of the synnere; but merci schal cumpasse hym that hopith in the Lord.
Psa 31:11 Ye iust men, be glad, and make fulli ioie in the Lord; and alle ye riytful of herte, haue glorie.
Psa 32:1 The two and threttithe salm hath no title. Ye iust men, haue fulli ioye in the Lord; presyng togidere bicometh riytful men.
Psa 32:2 Knouleche ye to the Lord in an harpe; synge ye to hym in a sautre of ten strengis.
Psa 32:3 Synge ye to hym a newe song; seie ye wel salm to hym in criyng.
Psa 32:4 For the word of the Lord is riytful; and alle hise werkis ben in feithfulnesse.
Psa 32:5 He loueth merci and doom; the erthe is ful of the merci of the Lord.
Psa 32:6 Heuenes ben maad stidfast bi the word of the Lord; and `al the vertu of tho bi the spirit of his mouth.
Psa 32:7 And he gaderith togidere the watris of the see as in a bowge; and settith depe watris in tresours.
Psa 32:8 Al erthe drede the Lord; sotheli alle men enhabitynge the world ben mouyd of hym.
Psa 32:9 For he seide, and thingis weren maad; he comaundide, and thingis weren maad of nouyt.
Psa 32:10 The Lord distrieth the counsels of folkis, forsothe he repreueth the thouytis of puplis; and he repreueth the counsels of prynces.
Psa 32:11 But the counsel of the Lord dwellith with outen ende; the thouytis of his herte dwellen in generacioun and into generacioun.
Psa 32:12 Blessid is the folk, whose Lord is his God; the puple which he chees into eritage to hym silf.
Psa 32:13 The Lord bihelde fro heuene; he siy alle the sones of men.
Psa 32:14 Fro his dwellyng place maad redi bifor; he bihelde on alle men, that enhabiten the erthe.
Psa 32:15 Which made syngulerli the soules of hem; which vndurstondith all the werkis of hem.
Psa 32:16 A kyng is not sauyd bi myche vertu; and a giaunt schal not be sauyd in the mychilnesse of his vertu.
Psa 32:17 An hors is false to helthe; forsothe he schal not be sauyd in the habundaunce, `ether plentee, of his vertu.
Psa 32:18 Lo! the iyen of the Lord ben on men dredynge hym; and in hem that hopen on his merci.
Psa 32:19 That he delyuere her soules fro deth; and feede hem in hungur.
Psa 32:20 Oure soule suffreth the Lord; for he is oure helpere and defendere.
Psa 32:21 For oure herte schal be glad in him; and we schulen haue hope in his hooli name.
Psa 32:22 Lord, thi merci be maad on vs; as we hopiden in thee.
Psa 33:1 The title of the thre and thrittithe salm. To Dauid, whanne he chaungide his mouth bifor Abymalech, and he `droof out Dauid, `and he yede forth.
Psa 33:2 I schal blesse the Lord in al tyme; euere his heriyng is in my mouth.
Psa 33:3 Mi soule schal be preisid in the Lord; mylde men here, and be glad.
Psa 33:4 Magnyfie ye the Lord with me; and enhaunse we his name into it silf.
Psa 33:5 I souyte the Lord, and he herde me; and he delyueride me fro alle my tribulaciouns.
Psa 33:6 Neiye ye to him, and be ye liytned; and youre faces schulen not be schent.
Psa 33:7 This pore man criede, and the Lord herde hym; and sauyde hym fro alle hise tribulaciouns.
Psa 33:8 The aungel of the Lord sendith in the cumpas of men dredynge hym; and he schal delyuere hem.
Psa 33:9 Taaste ye, and se, for the Lord is swete; blessid is the man, that hopith in hym.
Psa 33:10 Alle ye hooli men of the Lord, drede hym; for no nedynesse is to men dredynge hym.
Psa 33:11 Riche men weren nedi, and weren hungri; but men that seken the Lord schulen not faile of al good.
Psa 33:12 Come, ye sones, here ye me; Y schal teche you the drede of the Lord.
Psa 33:13 Who is a man, that wole lijf; loueth to se good daies?
Psa 33:14 Forbede thi tunge fro yuel; and thi lippis speke not gile.
Psa 33:15 Turne thou awei fro yuel, and do good; seke thou pees, and perfitli sue thou it.
Psa 33:16 The iyen of the Lord ben on iust men; and hise eeren ben to her preiers.
Psa 33:17 But the cheer of the Lord is on men doynge yuels; that he leese the mynde of hem fro erthe.
Psa 33:18 Just men cryeden, and the Lord herde hem; and delyueride hem fro alle her tribulaciouns.
Psa 33:19 The Lord is nyy hem that ben of troblid herte; and he schal saue meke men in spirit.
Psa 33:20 Many tribulaciouns ben of iust men; and the Lord schal delyuere hem fro alle these.
Psa 33:21 The Lord kepith alle the boonys of hem; oon of tho schal not be brokun.
Psa 33:22 The deth of synneris is werst; and thei that haten a iust man schulen trespasse.
Psa 33:23 The Lord schal ayenbie the soulis of hise seruauntis; and alle, that hopen in him, schulen not trespasse.
Psa 34:1 The title of the foure and thrittithe salm. `To Dauid. Lord, deme thou hem, that anoien me; ouercome thou hem, that fiyten ayens me.
Psa 34:2 Take thou armeris and scheeld; and rise vp into help to me.
Psa 34:3 Schede out the swerd, and close togidere ayens hem that pursuen me; seie thou to my soule, Y am thin helthe.
Psa 34:4 Thei that seken my lijf; be schent, and aschamed. Thei that thenken yuels to me; be turned awei bacward, and be schent.
Psa 34:5 Be thei maad as dust bifor the face of the wynd; and the aungel of the Lord make hem streit.
Psa 34:6 Her weie be maad derknesse, and slydirnesse; and the aungel of the Lord pursue hem.
Psa 34:7 For with out cause thei hidden to me the deth of her snare; in veyn thei dispisiden my soule.
Psa 34:8 The snare which he knoweth not come to hym, and the takyng which he hidde take hym; and fall he in to the snare in that thing.
Psa 34:9 But my soule schal fulli haue ioye in the Lord; and schal delite on his helthe.
Psa 34:10 Alle my boonys schulen seie, Lord, who is lijk thee? Thou delyuerist a pore man fro the hond of his strengere; a nedi man and pore fro hem that diuersely rauischen hym.
Psa 34:11 Wickid witnessis risynge axiden me thingis, whiche Y knewe not.
Psa 34:12 Thei yeldiden to me yuels for goodis; bareynnesse to my soule.
Psa 34:13 But whanne thei weren diseseful to me; Y was clothid in an heire. I mekide my soule in fastyng; and my preier schal be turned `with ynne my bosum.
Psa 34:14 I pleside so as oure neiybore, as oure brother; Y was `maad meke so as morenynge and sorewful.
Psa 34:15 And thei weren glad, and camen togidere ayens me; turmentis weren gaderid on me, and Y knew not.
Psa 34:16 Thei weren scaterid, and not compunct, thei temptiden me, thei scornyden me with mowyng; thei gnastiden on me with her teeth.
Psa 34:17 Lord, whanne thou schalt biholde, restore thou my soule fro the wickidnesse of hem; `restore thou myn oon aloone fro liouns.
Psa 34:18 I schal knowleche to thee in a greet chirche; Y schal herie thee in a sad puple.
Psa 34:19 Thei that ben aduersaries wickidli to me, haue not ioye on me; that haten me with out cause, and bikenen with iyen.
Psa 34:20 For sotheli thei spaken pesibli to me; and thei spekynge in wrathfulnesse of erthe thouyten giles.
Psa 34:21 And thei maden large her mouth on me; thei seiden, Wel, wel! oure iyen han sien.
Psa 34:22 Lord, thou hast seen, be thou not stille; Lord, departe thou not fro me.
Psa 34:23 Rise vp, and yyue tent to my doom; my God and my Lord, biholde in to my cause.
Psa 34:24 Mi Lord God, deme thou me bi thi riytfulnesse; and haue thei not ioye on me.
Psa 34:25 Seie thei not in her hertis, Wel, wel, to oure soule; nether seie thei, We schulen deuoure hym.
Psa 34:26 Shame thei, and drede thei togidere; that thanken for myn yuels. Be thei clothid with schame and drede; that speken yuele thingis on me.
Psa 34:27 Haue thei ful ioie, and be thei glad that wolen my riytfulnesse; and seie thei euere, The Lord be magnyfied, whiche wolen the pees of his seruaunt.
Psa 34:28 And my tunge schal bithenke thi riytfulnesse; al day thin heriyng.
Psa 35:1 `The title of the fyue and thrittithe salm. `To victorie, to Dauid, `the seruaunt of the Lord.
Psa 35:2 The vniust man seide, that he trespasse in hym silf; the drede of God is not bifor hise iyen.
Psa 35:3 For he dide gilefuli in the siyt of God; that his wickidnesse be foundun to hatrede.
Psa 35:4 The wordis of his mouth ben wickidnesse and gile, he nolde vndirstonde to do wel.
Psa 35:5 He thouyte wickidnesse in his bed, he stood nyy al weie not good; forsothe he hatide not malice.
Psa 35:6 Lord, thi merci is in heuene; and thi treuthe is `til to cloudis.
Psa 35:7 Thi riytfulnesse is as the hillis of God; thi domes ben myche depthe of watris. Lord, thou schalt saue men and beestis;
Psa 35:8 as thou, God, hast multiplied thi merci. But the sones of men; schulen hope in the hilyng of thi wyngis.
Psa 35:9 Thei schulen be fillid gretli of the plentee of thin hows; and thou schalt yyue drynke to hem with the steef streem of thi likyng.
Psa 35:10 For the wel of life is at thee; and in thi liyt we schulen se liyt.
Psa 35:11 Lord, sette forth thi mercy to hem, that knowen thee; and thi ryytfulnesse to hem that ben of riytful herte.
Psa 35:12 The foot of pryde come not to me; and the hond of the synnere moue me not.
Psa 35:13 There thei felden doun, that worchen wickidnesse; thei ben cast out, and myyten not stonde.
Psa 36:1 The title of the sixe and thrittithe salm. To Dauith. Nile thou sue wickid men; nether loue thou men doynge wickidnesse.
Psa 36:2 For thei schulen wexe drie swiftli as hey; and thei schulen falle doun soone as the wortis of eerbis.
Psa 36:3 Hope thou in the Lord, and do thou goodnesse; and enhabite thou the lond, and thou schalt be fed with hise richessis.
Psa 36:4 Delite thou in the Lord; and he schal yyue to thee the axyngis of thin herte.
Psa 36:5 Schewe thi weie to the Lord; and hope thou in hym, and he schal do.
Psa 36:6 And he schal lede out thi riytfulnesse as liyt, and thi doom as myddai;
Psa 36:7 be thou suget to the Lord, and preye thou hym. Nile thou sue hym, that hath prosperite in his weie; a man doynge vnriytfulnessis.
Psa 36:8 Ceese thou of ire, and forsake woodnesse; nyle thou sue, that thou do wickidli.
Psa 36:9 For thei, that doen wickidli, schulen be distried; but thei that suffren the Lord, schulen enerite the lond.
Psa 36:10 And yit a litil, and a synnere schal not be; and thou schalt seke his place, and schalt not fynde.
Psa 36:11 But mylde men schulen enerite the lond; and schulen delite in the multitude of pees.
Psa 36:12 A synnere schal aspie a riytful man; and he schal gnaste with hise teeth on hym.
Psa 36:13 But the Lord schal scorne the synnere; for he biholdith that his day cometh.
Psa 36:14 Synners drowen out swerd; thei benten her bouwe. To disseyue a pore man and nedi; to strangle riytful men of herte.
Psa 36:15 Her swerd entre in to the herte of hem silf; and her bouwe be brokun.
Psa 36:16 Betere is a litil thing to a iust man; than many richessis of synneris.
Psa 36:17 For the armes of synneris schal be al to-brokun; but the Lord confermeth iust men.
Psa 36:18 The Lord knowith the daies of vnwemmed; and her heritage schal be withouten ende.
Psa 36:19 Thei schulen not be schent in the yuel tyme, and thei schulen be fillid in the dayes of hungur;
Psa 36:20 for synneris schulen perische. Forsothe anoon as the enemyes of the Lord ben onourid, and enhaunsid; thei failynge schulen faile as smoke.
Psa 36:21 A synnere schal borewe, and schal not paie; but a iust man hath merci, and schal yyue.
Psa 36:22 For thei that blessen the Lord schulen enerite the lond; but thei that cursen hym schulen perische.
Psa 36:23 The goyng of a man schal be dressid anentis the Lord; and he schal wilne his weie.
Psa 36:24 Whanne he fallith, he schal not be hurtlid doun; for the Lord vndursettith his hond.
Psa 36:25 I was yongere, and sotheli Y wexide eld, and Y siy not a iust man forsakun; nethir his seed sekynge breed.
Psa 36:26 Al dai he hath merci, and leeneth; and his seed schal be in blessyng.
Psa 36:27 Bouwe thou awei fro yuel, and do good; and dwelle thou in to the world of world.
Psa 36:28 For the Lord loueth doom, and schal not forsake hise seyntis; thei schulen be kept with outen ende. Vniust men schulen be punyschid; and the seed of wickid men schal perische.
Psa 36:29 But iust men schulen enerite the lond; and schulen enabite theronne in to the world of world.
Psa 36:30 The mouth of a iust man schal bithenke wisdom; and his tunge schal speke doom.
Psa 36:31 The lawe of his God is in his herte; and hise steppis schulen not be disseyued.
Psa 36:32 A synnere biholdith a iust man; and sekith to sle hym.
Psa 36:33 But the Lord schal not forsake hym in hise hondis; nethir schal dampne hym, whanne it schal be demed ayens hym.
Psa 36:34 Abide thou the Lord, and kepe thou his weie, and he schal enhaunse thee, that bi eritage thou take the lond; whanne synneris schulen perische, thou schalt se.
Psa 36:35 I siy a wickid man enhaunsid aboue; and reisid vp as the cedris of Liban.
Psa 36:36 And Y passide, and lo! he was not; Y souyte hym, and his place is not foundun.
Psa 36:37 Kepe thou innocence, and se equite; for tho ben relikis to a pesible man.
Psa 36:38 Forsothe vniust men schulen perische; the relifs of wickid men schulen perische togidere.
Psa 36:39 But the helthe of iust men is of the Lord; and he is her defendere in the tyme of tribulacioun.
Psa 36:40 And the Lord schal helpe hem, and schal make hem fre, and he schal delyuere hem fro synneris; and he schal saue hem, for thei hopiden in hym.
Psa 37:1 The title of the seuene and thrittithe salm. `The salm of Dauid, to bythenke on the sabat.
Psa 37:2 Lord, repreue thou not me in thi strong veniaunce; nether chastice thou me in thin ire.
Psa 37:3 For thin arowis ben fitchid in me; and thou hast confermed thin hond on me.
Psa 37:4 Noon helthe is in my fleisch fro the face of thin ire; no pees is to my boonys fro the face of my synnes.
Psa 37:5 For my wickidnessis ben goon ouer myn heed; as an heuy birthun, tho ben maad heuy on me.
Psa 37:6 Myn heelid woundis weren rotun, and ben brokun; fro the face of myn vnwisdom.
Psa 37:7 I am maad a wretche, and Y am bowid doun til in to the ende; al dai Y entride sorewful.
Psa 37:8 For my leendis ben fillid with scornyngis; and helthe is not in my fleisch.
Psa 37:9 I am turmentid, and maad low ful greetli; Y roride for the weilyng of myn herte.
Psa 37:10 Lord, al my desire is bifor thee; and my weilyng is not hid fro thee.
Psa 37:11 Myn herte is disturblid in me, my vertu forsook me; and the liyt of myn iyen `forsook me, and it is not with me.
Psa 37:12 My frendis and my neiyboris neiyiden; and stoden ayens me. And thei that weren bisidis me stoden afer;
Psa 37:13 and thei diden violence, that souyten my lijf. And thei that souyten yuels to me, spaken vanytees; and thouyten gilis al dai.
Psa 37:14 But Y as a deef man herde not; and as a doumb man not openynge his mouth.
Psa 37:15 And Y am maad as a man not herynge; and not hauynge repreuyngis in his mouth.
Psa 37:16 For, Lord, Y hopide in thee; my Lord God, thou schalt here me.
Psa 37:17 For Y seide, Lest ony tyme myn enemyes haue ioye on me; and the while my feet ben mouyd, thei spaken grete thingis on me.
Psa 37:18 For Y am redi to betyngis; and my sorewe is euere in my siyt.
Psa 37:19 For Y schal telle my wickidnesse; and Y schal thenke for my synne.
Psa 37:20 But myn enemyes lyuen, and ben confermed on me; and thei ben multiplyed, that haten me wickidli.
Psa 37:21 Thei that yelden yuels for goodis, backbitiden me; for Y suede goodnesse.
Psa 37:22 My Lord God, forsake thou not me; go thou not awei fro me.
Psa 37:23 Lord God of myn helthe; biholde thou in to myn help.
Psa 38:1 The title of the eiyte and threttithe salm. For victorie, to Iditum, the song of Dauid.
Psa 38:2 I seide, Y schal kepe my weies; that Y trespasse not in my tunge. I settide kepyng to my mouth; whanne a synnere stood ayens me.
Psa 38:3 I was doumb, and was mekid ful gretli, and was stille fro goodis; and my sorewe was renulid.
Psa 38:4 Myn herte was hoot with ynne me; and fier schal brenne out in my thenkyng.
Psa 38:5 I spak in my tunge; Lord, make thou myn eende knowun to me. And the noumbre of my daies what it is; that Y wite, what failith to me.
Psa 38:6 Lo! thou hast set my daies mesurable; and my substaunce is as nouyt bifor thee. Netheles al vanytee; ech man lyuynge.
Psa 38:7 Netheles a man passith in ymage; but also he is disturblid veynli. He tresorith; and he noot, to whom he `schal gadere tho thingis.
Psa 38:8 And now which is myn abiding? whether not the Lord? and my substaunce is at thee.
Psa 38:9 Delyuere thou me fro alle my wickidnessis; thou hast youe me schenschip to the vnkunnynge.
Psa 38:10 I was doumbe, and openyde not my mouth; for thou hast maad,
Psa 38:11 remoue thou thi woundis fro me.
Psa 38:12 Fro the strengthe of thin hond Y failide in blamyngis; for wickidnesse thou hast chastisid man. And thou madist his lijf to faile as an yreyne; netheles ech man is disturblid in veyn.
Psa 38:13 Lord, here thou my preier and my bisechyng; perseyue thou with eeris my teeris.
Psa 38:14 Be thou not stille, for Y am a comelyng at thee; and a pilgrime, as alle my fadris.
Psa 38:15 Foryyue thou to me, that Y be refreischid, bifor that Y go; and Y schal no more be.
Psa 39:1 The title of the nyne and threttithe salm. For victorie, the song of Dauid.
Psa 39:2 Y abidynge abood the Lord; and he yaf tent to me.
Psa 39:3 And he herde my preieris; and he ledde out me fro the lake of wretchidnesse, and fro the filthe of draft. And he ordeynede my feet on a stoon; and he dresside my goyngis.
Psa 39:4 And he sente in to my mouth a newe song; a song to oure God. Many men schulen se, and schulen drede; and schulen haue hope in the Lord.
Psa 39:5 Blessid is the man, of whom the name of the Lord is his hope; and he bihelde not in to vanitees, and in to false woodnesses.
Psa 39:6 Mi Lord God, thou hast maad thi merueils manye; and in thi thouytis noon is, that is lijk thee. I teld, and Y spak; and thei ben multiplied aboue noumbre.
Psa 39:7 Thou noldist sacrifice and offryng; but thou madist perfitli eeris to me. Thou axidist not brent sacrifice, and sacrifice for synne;
Psa 39:8 thanne Y seide, Lo! Y come. In the heed of the book it is writun of me,
Psa 39:9 that Y schulde do thi wille; my God, Y wolde; and thi lawe in the myddis of myn herte.
Psa 39:10 I telde thi riytfulnesse in a greet chirche; lo! Y schal not refreine my lippis, Lord, thou wistist.
Psa 39:11 I hidde not thi riytfulnesse in myn herte; Y seide thi treuthe and thin helthe. I hidde not thi mercy and thi treuthe; fro a myche counsel.
Psa 39:12 But thou, Lord, make not fer thi merciful doyngis fro me; thi mercy and treuthe euere token me vp.
Psa 39:13 For whi yuels, of whiche is no noumbre, cumpassiden me; my wickidnessis token me, and y myyte not, that Y schulde se. Tho ben multiplied aboue the heeris of myn heed; and myn herte forsook me.
Psa 39:14 Lord, plese it to thee, that thou delyuere me; Lord, biholde thou to helpe me.
Psa 39:15 Be thei schent, and aschamed togidere; that seken my lijf, to take awei it. Be thei turned abac, and be thei schamed; that wolen yuels to me.
Psa 39:16 Bere thei her confusioun anoon; that seien to me, Wel! wel! `that is, in scorn.
Psa 39:17 Alle men that seken thee, be fulli ioyful, and be glad on thee; and seie thei, that louen thin helthe, The Lord be magnyfied euere.
Psa 39:18 Forsothe Y am a beggere and pore; the Lord is bisi of me. Thou arte myn helpere and my defendere; my God, tarie thou not.
Psa 40:1 The title of the fourtithe salm. For victorie, the song of Dauid.
Psa 40:2 Blessid is he that vndurstondith `on a nedi man and pore; the Lord schal delyuere hym in the yuel dai.
Psa 40:3 The Lord kepe hym, and quykene hym, and make hym blesful in the lond; and bitake not hym in to the wille of his enemyes.
Psa 40:4 The Lord bere help to hym on the bed of his sorewe; thou hast ofte turned al his bed stre in his sijknesse.
Psa 40:5 I seide, Lord, haue thou mercy on me; heele thou my soule, for Y synnede ayens thee.
Psa 40:6 Myn enemyes seiden yuels to me; Whanne schal he die, and his name schal perische?
Psa 40:7 And if he entride for to se, he spak veyn thingis; his herte gaderide wickidnesse to hym silf.
Psa 40:8 He yede with out forth; and spak to the same thing. Alle myn enemyes bacbitiden pryuyli ayens me; ayens me thei thouyten yuels to me.
Psa 40:9 Thei ordeineden an yuel word ayens me; Whether he that slepith, schal not leie to, that he rise ayen?
Psa 40:10 For whi the man of my pees, in whom Y hopide, he that eet my looues; made greet disseit on me.
Psa 40:11 But thou, Lord, haue merci on me, and reise me ayen; and Y schal yelde to hem.
Psa 40:12 In this thing Y knew, that thou woldist me; for myn enemye schal not haue ioye on me.
Psa 40:13 Forsothe thou hast take me vp for ynnocence; and hast confermed me in thi siyt with outen ende.
Psa 40:14 Blessid be the Lord God of Israel, fro the world and in to the world; be it doon, be it doon.
Psa 41:1 The title of the oon and fourtithe salm. To victorie, to the sones of Chore.
Psa 41:2 As an hert desirith to the wellis of watris; so thou, God, my soule desirith to thee.
Psa 41:3 Mi soule thirstide to God, `that is a `quik welle; whanne schal Y come, and appere bifor the face of God?
Psa 41:4 Mi teeris weren looues to me bi dai and nyyt; while it is seid to me ech dai, Where is thi God?
Psa 41:5 I bithouyte of these thingis, and Y schedde out in me my soule; for Y schal passe in to the place of the wondurful tabernacle, til to the hows of God. In the vois of ful out ioiyng and knoulechyng; is the sown of the etere.
Psa 41:6 Mi soule, whi art thou sory; and whi disturblist thou me? Hope thou in God, for yit Y schal knouleche to hym; he is the helthe of my cheer,
Psa 41:7 and my God. My soule is disturblid at my silf; therfor, God, Y schal be myndeful of thee fro the lond of Jordan, and fro the litil hil Hermonyim.
Psa 41:8 Depthe clepith depthe; in the vois of thi wyndows. Alle thin hiye thingis and thi wawis; passiden ouer me.
Psa 41:9 The Lord sente his merci in the dai; and his song in the nyyt.
Psa 41:10 At me is a preier to the God of my lijf; Y schal seie to God, Thou art my `takere vp. Whi foryetist thou me; and whi go Y sorewful, while the enemy turmentith me?
Psa 41:11 While my boonys ben brokun togidere; myn enemyes, that troblen me, dispiseden me. While thei seien to me, bi alle daies; Where is thi God?
Psa 41:12 Mi soule, whi art thou sori; and whi disturblist thou me? Hope thou in God, for yit Y schal knouleche to hym; `he is the helthe of my cheer, and my God.
Psa 42:1 `The two and fourtithe salm. God, deme thou me, and departe thou my cause fro a folc not hooli; delyuere thou me fro a wickid man, and gileful.
Psa 42:2 For thou art God, my strengthe; whi hast thou put me abac, and whi go Y soreuful, while the enemy turmentith me?
Psa 42:3 Sende out thi liyt, and thi treuthe; tho ledden me forth, and brouyten in to thin hooli hil, and in to thi tabernaclis.
Psa 42:4 And Y schal entre to the auter of God; to God, that gladith my yongthe. God, my God, Y schal knowleche to thee in an harpe; my soule,
Psa 42:5 whi art thou sory, and whi troblist thou me? Hope thou in God, for yit Y schal knouleche to hym; he is the helthe of my cheer, and my God.
Psa 43:1 The title of the thre and fourtithe salm. `To victorie, lernyng to the sones of Chore.
Psa 43:2 God, we herden with oure eeris; oure fadris telden to vs. The werk, which thou wrouytist in the daies of hem; and in elde daies.
Psa 43:3 Thin hond lost hethene men, and thou plauntidist hem; thou turmentidist puplis, and castidist hem out.
Psa 43:4 For the children of Israel weldiden the lond not bi her swerd; and the arm of hem sauyde not hem. But thi riyt hond, and thin arm, and the liytnyng of thi cheer; for thou were plesid in hem.
Psa 43:5 Thou art thi silf, my kyng and my God; that sendist helthis to Jacob.
Psa 43:6 Bi thee we schulen wyndewe oure enemyes with horn; and in thi name we schulen dispise hem, that risen ayen vs.
Psa 43:7 For Y schal not hope in my bouwe; and my swerd schal not saue me.
Psa 43:8 For thou hast saued vs fro men turmentinge vs; and thou hast schent men hatinge vs.
Psa 43:9 We schulen be preisid in God al dai; and in thi name we schulen knouleche to thee in to the world.
Psa 43:10 But now thou hast put vs abac, and hast schent vs; and thou, God, schalt not go out in oure vertues.
Psa 43:11 Thou hast turned vs awei bihynde aftir oure enemyes; and thei, that hatiden vs, rauyschiden dyuerseli to hem silf.
Psa 43:12 Thou hast youe vs as scheep of meetis; and among hethene men thou hast scaterid vs.
Psa 43:13 Thou hast seeld thi puple with out prijs; and multitude was not in the chaungyngis of hem.
Psa 43:14 Thou hast set vs schenschip to oure neiyboris; mouwyng and scorn to hem that ben in oure cumpas.
Psa 43:15 Thou hast set vs into licnesse to hethene me; stiryng of heed among puplis.
Psa 43:16 Al dai my schame is ayens me; and the schenschipe of my face hilide me.
Psa 43:17 Fro the vois of dispisere, and yuele spekere; fro the face of enemy, and pursuere.
Psa 43:18 Alle these thingis camen on vs, and we han not foryete thee; and we diden not wickidli in thi testament.
Psa 43:19 And oure herte yede not awei bihynde; and thou hast bowid awei oure pathis fro thi weie.
Psa 43:20 For thou hast maad vs lowe in the place of turment; and the schadewe of deth hilide vs.
Psa 43:21 If we foryaten the name of oure God; and if we helden forth oure hondis to an alien God.
Psa 43:22 Whether God schal not seke these thingis? for he knowith the hid thingis of herte. For whi we ben slayn al dai for thee; we ben demed as scheep of sleyng.
Psa 43:23 Lord, rise vp, whi slepist thou? rise vp, and putte not awei in to the ende.
Psa 43:24 Whi turnest thou awei thi face? thou foryetist oure pouert, and oure tribulacioun.
Psa 43:25 For oure lijf is maad low in dust; oure wombe is glued togidere in the erthe.
Psa 43:26 Lord, rise vp thou, and helpe vs; and ayenbie vs for thi name.
Psa 44:1 The title of the foure and fourtithe salm. To the ouercomere for the lilies, the most loued song of lernyng of the sones of Chore.
Psa 44:2 Myn herte hath teld out a good word; Y seie my workis `to the kyng. Mi tunge is `a penne of a writere; writynge swiftli.
Psa 44:3 Crist, thou art fairer in schap than the sones of men; grace is spred abrood in thi lippis; therfor God blessid thee withouten ende.
Psa 44:4 Be thou gird with thi swerd; on thi hipe most myytili.
Psa 44:5 Biholde thou in thi schaplynesse and thi fairnesse; come thou forth with prosperite, and regne thou. For treuthe, and myldenesse, and riytfulnesse; and thi riyt hond schal lede forth thee wondurfuli.
Psa 44:6 Thi scharpe arowis schulen falle in to the hertis of the enemyes of the kyng; puplis schulen be vndur thee.
Psa 44:7 God, thi seete is in to the world of world; the yerde of thi rewme is a yerde of riyt reulyng, `ethir of equite.
Psa 44:8 Thou louedist riytfulnesse, and hatidist wickidnesse; therfor thou, God, thi God, anoyntide thee with the oile of gladnesse, more than thi felowis.
Psa 44:9 Mirre, and gumme, and cassia, of thi clothis, of the `housis yuer;
Psa 44:10 of whiche the douytris of kyngis delitiden thee. A queen stood nyy on thi riyt side in clothing ouergildid; cumpassid with dyuersitee.
Psa 44:11 Douyter, here thou, and se, and bowe doun thin eere; and foryete thi puple, and the hows of thi fadir.
Psa 44:12 And the kyng schal coueyte thi fairnesse; for he is thi Lord God, and thei schulen worschipe hym.
Psa 44:13 And the douytris of Tire in yiftis; alle the riche men of the puple schulen biseche thi cheer.
Psa 44:14 Al the glorye of that douyter of the kyng is with ynne in goldun hemmes;
Psa 44:15 sche is clothid aboute with dyuersitees. Virgyns schulen be brouyt to the kyng aftir hir; hir neiyboressis schulen be brouyt to thee.
Psa 44:16 Thei schulen be brouyt in gladnesse, and ful out ioiyng; thei schulen be brouyt in to the temple of the kyng.
Psa 44:17 Sones ben borun to thee, for thi fadris; thou schalt ordeyne hem princes on al erthe.
Psa 44:18 Lord, thei schulen be myndeful of thi name; in ech generacioun, and in to generacioun. Therfor puplis schulen knouleche to thee withouten ende; and in to the world of world.
Psa 45:1 The title of the five and fourtithe salm. To the ouercomere, the song of the sones `of Chore, `for yongthis.
Psa 45:2 Oure God, thou art refuyt, and vertu; helpere in tribulacions, that han founde vs greetly.
Psa 45:3 Therfor we schulen not drede, while the erthe schal be troblid; and the hillis schulen be borun ouer in to the herte of the see.
Psa 45:4 The watris of hem sowneden, and weren troblid; hillis weren troblid togidere in the strengthe of hym.
Psa 45:5 The feersnesse of flood makith glad the citee of God; the hiyeste God hath halewid his tabernacle.
Psa 45:6 God in the myddis therof schal not be moued; God schal helpe it eerli in the grey morewtid.
Psa 45:7 Hethene men weren disturblid togidere, and rewmes weren bowid doun; God yaf his vois, the erthe was moued.
Psa 45:8 The Lord of vertues is with vs; God of Jacob is oure vptakere.
Psa 45:9 Come ye, and se the werkis of the Lord; whiche wondris he hath set on the erthe.
Psa 45:10 He doynge awei batels til to the ende of the lond; schal al to-brese bouwe, and schal breke togidere armuris, and schal brenne scheldis bi fier.
Psa 45:11 Yyue ye tent, and se ye, that Y am God; Y schal be enhaunsid among hethene men; and Y schal be enhaunsid in erthe.
Psa 45:12 The Lord of vertues is with vs; God of Jacob is oure vptakere.
Psa 46:1 The title of the sixte and fourtithe salm. To victorie, a salm to the sones of Chore.
Psa 46:2 Alle ye folkis, make ioie with hondis; synge ye hertli to God in the vois of ful out ioiyng.
Psa 46:3 For the Lord is hiy and ferdful; a greet kyng on al erthe.
Psa 46:4 He made puplis suget to vs; and hethene men vndur oure feet.
Psa 46:5 He chees his eritage to vs; the fairnesse of Jacob, whom he louyde.
Psa 46:6 God stiede in hertli song; and the Lord in the vois of a trumpe.
Psa 46:7 Synge ye to oure God, synge ye; synge ye to oure kyng, synge ye.
Psa 46:8 For God is kyng of al erthe; synge ye wiseli.
Psa 46:9 God schal regne on hethene men; God sittith on his hooli seete.
Psa 46:10 The princes of puplis ben gaderid togidere with God of Abraham; for the stronge goddis of erthe ben reisid greetli.
Psa 47:1 The title of the seuene and fourtithe salm. The song of salm, of the sones of Chore.
Psa 47:2 The Lord is greet, and worthi to be preisid ful myche; in the citee of oure God, in the hooli hil of hym.
Psa 47:3 It is foundid in the ful out ioiyng of al erthe; the hil of Syon; the sidis of the north, the citee of the greet kyng.
Psa 47:4 God schal be knowun in the housis therof; whanne he schal take it.
Psa 47:5 For lo! the kyngis of erthe weren gaderid togidere; thei camen into o place.
Psa 47:6 Thei seynge so wondriden; thei weren disturblid, thei weren mouyd togidere, tremblyng took hem.
Psa 47:7 There sorewis as of a womman trauelynge of child;
Psa 47:8 in a greet spirit thou schalt al to-breke the schippis of Tharsis.
Psa 47:9 As we herden, so we sien, in the citee of the Lord of vertues, in the citee of oure God; God hath foundid that citee with outen ende.
Psa 47:10 God, we han resseyued thi mercy; in the myddis of thi temple.
Psa 47:11 Aftir thi name, God, so thin heriyng is spred abrood in to the endis of erthe; thi riyt hond is ful of riytfulnesse.
Psa 47:12 The hil of Sion be glad, and the douytris of Judee be fulli ioiful; for thi domes, Lord.
Psa 47:13 Cumpasse ye Syon, and biclippe ye it; telle ye in the touris therof.
Psa 47:14 Sette ye youre hertis in the vertu of him; and departe ye the housis of hym, that ye telle out in an other generacioun.
Psa 47:15 For this is God, oure God, in to withouten ende, and in to the world of world; he schal gouerne vs in to worldis.
Psa 48:1 The title of the eiyte and fourtithe salm. To victorie, a salm to the sones of Chore.
Psa 48:2 Alle ye folkis, here these thingis; alle ye that dwellen in the world, perseyue with eeris.
Psa 48:3 Alle the sones of erthe and the sones of men; togidere the riche man and the pore in to oon.
Psa 48:4 Mi mouth schal speke wisdom; and the thenkyng of myn herte schal speke prudence.
Psa 48:5 I schal bouwe doun myn eere in to a parable; Y schal opene my resoun set forth in a sautree.
Psa 48:6 Whi schal Y drede in the yuel dai? the wickidnesse of myn heele schal cumpasse me.
Psa 48:7 Whiche tristen in her owne vertu; and han glorie in the multitude of her richessis.
Psa 48:8 A brother ayenbieth not, schal a man ayenbie? and he schal not yyue to God his plesyng.
Psa 48:9 And he schal not yyue the prijs of raunsum of his soule; and he schal trauele with outen ende,
Psa 48:10 and he schal lyue yit in to the ende.
Psa 48:11 He schal not se perischyng, whanne he schal se wise men diynge; the vnwise man and fool schulen perische togidere. And thei schulen leeue her richessis to aliens;
Psa 48:12 and the sepulcris of hem ben the housis of hem with outen ende. The tabernaclis of hem ben in generacioun and generacioun; thei clepiden her names in her londis.
Psa 48:13 A man, whanne he was in honour, vndurstood not; he is comparisound to vnwise beestis, and he is maad lijk to tho.
Psa 48:14 This weie of hem is sclaundir to hem; and aftirward thei schulen plese togidere in her mouth.
Psa 48:15 As scheep thei ben set in helle; deth schal gnawe hem. And iust men schulen be lordis of hem in the morewtid; and the helpe of hem schal wexe eld in helle, for the glorie of hem.
Psa 48:16 Netheles God schal ayenbie my soule from the power of helle; whanne he schal take me.
Psa 48:17 Drede thou not, whanne a man is maad riche; and the glorie of his hows is multiplied.
Psa 48:18 For whanne he schal die, he schal not take alle thingis; and his glorie schal not go doun with him.
Psa 48:19 For his soule schal be blessid in his lijf; he schal knouleche to thee, whanne thou hast do wel to hym.
Psa 48:20 He schal entre til in to the generaciouns of hise fadris; and til in to with outen ende he schal not se liyt.
Psa 48:21 A man, whanne he was in honour, vndurstood not; he is comparisound to vnwise beestis, and is maad lijk to tho.
Psa 49:1 The title of the nyne and fourtithe salm. The salm of Asaph. God, the Lord of goddis, spak; and clepide the erthe,
Psa 49:2 fro the risynge of the sunne til to the goyng doun. The schap of his fairnesse fro Syon,
Psa 49:3 God schal come opynli; oure God, and he schal not be stille. Fier schal brenne an hiye in his siyt; and a strong tempest in his cumpas.
Psa 49:4 He clepide heuene aboue; and the erthe, to deme his puple.
Psa 49:5 Gadere ye to hym hise seyntis; that ordeynen his testament aboue sacrifices.
Psa 49:6 `And heuenes schulen schewe his riytfulnesse; for God is the iuge.
Psa 49:7 Mi puple, here thou, and Y schal speke to Israel; and Y schal witnesse to thee, Y am God, thi God.
Psa 49:8 I schal not repreue thee in thi sacrifices; and thi brent sacrifices ben euere bifor me.
Psa 49:9 I schal not take calues of thin hows; nethir geet buckis of thi flockis.
Psa 49:10 For alle the wyelde beestis of wodis ben myne; werk beestis, and oxis in hillis.
Psa 49:11 I haue knowe alle the volatils of heuene; and the fairnesse of the feeld is with me.
Psa 49:12 If Y schal be hungry, Y schal not seie to thee; for the world and the fulnesse therof is myn.
Psa 49:13 Whether Y schal eete the fleischis of boolis? ethir schal Y drynke the blood of geet buckis?
Psa 49:14 Offre thou to God the sacrifice of heriyng; and yelde thin avowis to the hiyeste God.
Psa 49:15 And inwardli clepe thou me in the dai of tribulacioun; and Y schal delyuere thee, and thou schalt onoure me.
Psa 49:16 But God seide to the synnere, Whi tellist thou out my riytfulnessis; and takist my testament bi thi mouth?
Psa 49:17 Sotheli thou hatidist lore; and hast cast awey my wordis bihynde.
Psa 49:18 If thou siyest a theef, thou `hast runne with hym; and thou settidist thi part with avowtreris.
Psa 49:19 Thi mouth was plenteuouse of malice; and thi tunge medlide togidere giles.
Psa 49:20 Thou sittynge spakist ayens thi brother, and thou settidist sclaundir ayens the sone of thi modir;
Psa 49:21 thou didist these thingis, and Y was stille. Thou gessidist wickidli, that Y schal be lijk thee; Y schal repreue thee, and Y schal sette ayens thi face.
Psa 49:22 Ye that foryeten God, vndurstonde these thingis; lest sum tyme he rauysche, and noon be that schal delyuere.
Psa 49:23 The sacrifice of heriyng schal onoure me; and there is the weie, where ynne Y schal schewe to hym the helthe of God.
Psa 50:1 The title of the fiftithe salm. To victorie, the salm of Dauid;
Psa 50:2 `whanne Nathan the prophete cam to hym, whanne he entride to Bersabee.
Psa 50:3 God, haue thou merci on me; bi thi greet merci. And bi the mychilnesse of thi merciful doyngis; do thou awei my wickidnesse.
Psa 50:4 More waische thou me fro my wickidnesse; and clense thou me fro my synne.
Psa 50:5 For Y knouleche my wickidnesse; and my synne is euere ayens me.
Psa 50:6 I haue synned to thee aloone, and Y haue do yuel bifor thee; that thou be iustified in thi wordis, and ouercome whanne thou art demed. For lo!
Psa 50:7 Y was conseyued in wickednessis; and my modir conceyuede me in synnes.
Psa 50:8 For lo! thou louedist treuthe; thou hast schewid to me the vncerteyn thingis, and pryuy thingis of thi wisdom.
Psa 50:9 Lord, sprenge thou me with ysope, and Y schal be clensid; waische thou me, and Y schal be maad whijt more than snow.
Psa 50:10 Yyue thou ioie, and gladnesse to myn heryng; and boonys maad meke schulen ful out make ioye.
Psa 50:11 Turne awei thi face fro my synnes; and do awei alle my wickidnesses.
Psa 50:12 God, make thou a clene herte in me; and make thou newe a riytful spirit in my entrailis.
Psa 50:13 Caste thou me not awei fro thi face; and take thou not awei fro me thin hooli spirit.
Psa 50:14 Yiue thou to me the gladnesse of thyn helthe; and conferme thou me with the principal spirit.
Psa 50:15 I schal teche wickid men thi weies; and vnfeithful men schulen be conuertid to thee.
Psa 50:16 God, the God of myn helthe, delyuere thou me fro bloodis; and my tunge schal ioyfuli synge thi riytfulnesse.
Psa 50:17 Lord, `opene thou my lippis; and my mouth schal telle thi preysyng.
Psa 50:18 For if thou haddist wold sacrifice, Y hadde youe; treuli thou schalt not delite in brent sacrifices.
Psa 50:19 A sacrifice to God is a spirit troblid; God, thou schalt not dispise a contrit herte and `maad meke.
Psa 50:20 Lord, do thou benygneli in thi good wille to Syon; that the wallis of Jerusalem be bildid.
Psa 50:21 Thanne thou schalt take plesauntli the sacrifice of riytfulnesse, offryngis, and brent sacrifices; thanne thei schulen putte calues on thin auter.
Psa 51:1 The title of the oon and fiftithe salm. To victorie, the salm of Dauid,
Psa 51:2 `whanne Doech Idumei cam, and telde to Saul, and seide to him, Dauid cam in to the hows of Abymelech.
Psa 51:3 What hast thou glorie in malice; which art miyti in wickidnesse?
Psa 51:4 Al dai thi tunge thouyte vnriytfulnesse; as a scharp rasour thou hast do gile.
Psa 51:5 Thou louedist malice more than benygnite; `thou louedist wickidnesse more than to speke equite.
Psa 51:6 Thou louedist alle wordis of casting doun; with a gileful tunge.
Psa 51:7 Therfor God schal distrie thee in to the ende, he schal drawe thee out bi the roote, and he schal make thee to passe awei fro thi tabernacle; and thi roote fro the lond of lyuynge men.
Psa 51:8 Iust men schulen se, and schulen drede; and thei schulen leiye on hym, and thei schulen seie, Lo!
Psa 51:9 the man that settide not God his helpere. But he hopide in the multitude of his richessis; and hadde maistrie in his vanite.
Psa 51:10 Forsothe Y, as a fruytful olyue tre in the hous of God; hopide in the merci of God with outen ende, and in to the world of world.
Psa 51:11 Y schal knowleche to thee in to the world, for thou hast do mercy to me; and Y schal abide thi name, for it is good in the siyt of thi seyntis.
Psa 52:1 The title of the two and fiftithe salm. To the ouercomer bi the quere, the lernyng of Dauid. The vnwise man seide in his herte; God is not.
Psa 52:2 Thei ben `corrupt, and maad abhomynable in her wickidnessis; noon is that doith good.
Psa 52:3 God bihelde fro heuene on the sones of men; that he se, if `ony is vndurstondynge, ether sekynge God.
Psa 52:4 Alle boweden awei, thei ben maad vnprofitable togidre; noon is that doith good, ther is not til to oon.
Psa 52:5 Whether alle men, that worchen wickidnesse, schulen not wite; whiche deuouren my puple as the mete of breed?
Psa 52:6 Thei clepiden not God; there thei trembliden for drede, where no drede was. For God hath scaterid the boones of hem, that plesen men; thei ben schent, for God hath forsake hem.
Psa 52:7 Who schal yyue fro Syon helthe to Israel? whanne the Lord hath turned the caitifte of his puple, Jacob schal `ful out make ioie, and Israel schal be glad.
Psa 53:1 The title of the thre and fiftithe salm. To victorie in orguns, ether in salmes, the lernyng of Dauid,
Psa 53:2 `whanne Zyfeys camen, and seiden to Saul, Whethir Dauid is not hid at vs?
Psa 53:3 God, in thi name make thou me saaf; and in thi vertu deme thou me.
Psa 53:4 God, here thou my preier; with eeris perseyue thou the wordis of my mouth.
Psa 53:5 For aliens han rise ayens me, and stronge men souyten my lijf; and thei settiden not God bifor her siyt.
Psa 53:6 For, lo! God helpith me; and the Lord is vptaker of my soule.
Psa 53:7 Turne thou awei yuelis to myn enemyes; and leese thou hem in thi treuthe.
Psa 53:8 Wilfuli Y schal make sacrifice to thee; and, Lord, Y schal knouleche to thi name, for it is good.
Psa 53:9 For thou delyueridist me fro al tribulacioun; and myn iye dispiside on myn enemyes.
Psa 54:1 The title of the foure and fiftithe salm. `In Ebreu thus, To victorie in orguns, the lernyng of Dauid. `In Jeroms translacioun thus, To the ouercomer in salmes of Dauid lernid.
Psa 54:2 God, here thou my preier, and dispise thou not my biseching;
Psa 54:3 yyue thou tent to me, and here thou me. I am sorewful in myn exercising; and Y am disturblid of the face of the enemye,
Psa 54:4 and of the tribulacioun of the synner. For thei bowiden wickidnessis in to me; and in ire thei weren diseseful to me.
Psa 54:5 Myn herte was disturblid in me; and the drede of deth felde on me.
Psa 54:6 Drede and trembling camen on me; and derknessis hiliden me.
Psa 54:7 And Y seide, Who schal yyue to me fetheris, as of a culuer; and Y schal fle, and schal take rest?
Psa 54:8 Lo! Y yede fer awei, and fledde; and Y dwellide in wildirnesse.
Psa 54:9 I abood hym, that made me saaf fro the litilnesse, `ether drede, of spirit; and fro tempest.
Psa 54:10 Lord, caste thou doun, departe thou the tungis of hem; for Y siy wickidnesse and ayenseiyng in the citee.
Psa 54:11 Bi dai and nyyt wickidnesse schal cumpasse it on the wallis therof;
Psa 54:12 and trauel and vnriytfulnesse ben in the myddis therof. And vsure and gile failide not; fro the stretis therof.
Psa 54:13 For if myn enemye hadde cursid me; sotheli Y hadde suffride. And if he, that hatide me, hadde spoke greet thingis on me; in hap Y hadde hid me fro hym.
Psa 54:14 But thou art a man of o wille; my leeder, and my knowun.
Psa 54:15 Which tokist togidere swete meetis with me; we yeden with consent in the hous of God.
Psa 54:16 Deth come on hem; and go thei doun quyk in to helle. For weiwardnessis ben in the dwelling places of hem; in the myddis of hem.
Psa 54:17 But Y criede to thee, Lord; and the Lord sauede me.
Psa 54:18 In the euentid and morewtid and in myddai Y schal telle, and schewe; and he schal here my vois.
Psa 54:19 He schal ayenbie my soule in pees fro hem, that neiyen to me; for among manye thei weren with me.
Psa 54:20 God schal here; and he that is bifore the worldis schal make hem low. For chaungyng is not to hem, and thei dredden not God;
Psa 54:21 he holdith forth his hoond in yelding. Thei defouliden his testament,
Psa 54:22 the cheris therof weren departid fro ire; and his herte neiyede. The wordis therof weren softer than oyle; and tho ben dartis.
Psa 54:23 Caste thi cure on the Lord, and he schal fulli nurische thee; and he schal not yyue with outen ende flotering to a iust man.
Psa 54:24 But thou, God, schalt lede hem forth; in to the pit of deth. Menquelleris and gilours schulen not haue half her daies; but, Lord, Y schal hope in thee.
Psa 55:1 The title of the fyue and fiftithe salm. `In Ebreu thus, To the ouercomyng on the doumb culuer of fer drawing awei, the comely song of Dauid, whanne Filisteis helden hym in Geth. `In Jeroms translacioun thus, To the ouercomer for the doumb culuer, for it yede awei fer. Dauid meke and symple made this salm, whanne Palesteyns helden hym in Geth.
Psa 55:2 God, haue thou merci on me, for a man hath defoulid me; al dai he impugnyde, and troublide me.
Psa 55:3 Myn enemyes defouliden me al dai; for manye fiyteris weren ayens me.
Psa 55:4 Of the hiynesse of dai Y schal drede; but God Y schal hope in thee.
Psa 55:5 In God Y schal preise my wordis; Y hopide in God, Y schal not drede what thing fleisch schal do to me.
Psa 55:6 Al dai thei cursiden my wordis; ayens me alle her thouytis weren in to yuel.
Psa 55:7 Thei schulen dwelle, and schulen hide; thei schulen aspie myn heele.
Psa 55:8 As thei abiden my lijf, for nouyt schalt thou make hem saaf; in ire thou schalt breke togidre puplis.
Psa 55:9 God, Y schewide my lijf to thee; thou hast set my teeris in thi siyt. As and in thi biheest, Lord;
Psa 55:10 thanne myn enemyes schulen be turned abak. In what euere dai Y schal inwardli clepe thee; lo! Y haue knowe, that thou art my God.
Psa 55:11 In God Y schal preise a word; in the Lord Y schal preyse a word. Y schal hope in God; Y schal not drede what thing a man schal do to me.
Psa 55:12 God, thin auowis ben in me; whiche Y schal yelde heriyngis to thee.
Psa 55:13 For thou hast delyuerid my lijf fro deth, and my feet fro slidyng; that Y pleese bifore God in the liyt of hem that lyuen.
Psa 56:1 The title of the sixte and fiftithe salm. `In Ebreu thus, To the victorie, lese thou not the semeli song, `ether the `swete song of Dauid, `whanne he fledde fro the face of Saul in to the denne. `In Jeroms translacioun thus, For victorie, that thou lese not Dauid, meke and simple, whanne he fledde fro the face of Saul in to the denne.
Psa 56:2 God, haue thou merci on me, haue thou merci on me; for my soule tristith in thee. And Y schal hope in the schadewe of thi wyngis; til wickidnesse passe.
Psa 56:3 I schal crye to God altherhiyeste; to God that dide wel to me.
Psa 56:4 He sente fro heuene, and delyuerede me; he yaf in to schenschip hem that defoulen me. God sente his merci and his treuthe,
Psa 56:5 and delyuerede my soule fro the myddis of whelpis of liouns; Y slepte disturblid. The sones of men, the teeth of hem ben armuris and arowis; and her tunge is a scharp swerd.
Psa 56:6 God, be thou enhaunsid aboue heuenes; and thi glorie aboue al erthe.
Psa 56:7 Thei maden redi a snare to my feet; and thei greetly boweden my lijf. Thei delueden a diche bifore my face; and thei felden doun in to it.
Psa 56:8 God, myn herte is redi, myn herte is redi; Y schal singe, and Y schal seie salm.
Psa 56:9 Mi glorie, rise thou vp; sautrie and harpe, rise thou vp; Y schal rise vp eerli.
Psa 56:10 Lord, Y schal knouleche to thee among puplis; and Y schal seie salm among hethene men.
Psa 56:11 For thi merci is magnified til to heuenes; and thi treuthe til to cloudis.
Psa 56:12 God, be thou enhaunsid aboue heuenes; and thi glorie ouer al erthe.
Psa 57:1 The title of the seuene and fiftithe salm. `In Ebreu thus, To victorie; `lese thou not the swete song, ether the semely salm, of Dauid. `In Jeroms translacioun thus, To the ouercomere, that thou lese not Dauid, meke and simple.
Psa 57:2 Forsothe if ye speken riytfulnesse verili; ye sones of men, deme riytfuli.
Psa 57:3 For in herte ye worchen wickidnesse in erthe; youre hondis maken redi vnriytfulnessis.
Psa 57:4 Synneris weren maad aliens fro the wombe; thei erriden fro the wombe, thei spaken false thingis.
Psa 57:5 Woodnesse is to hem, bi the licnesse of a serpent; as of a deef snake, and stoppynge hise eeris.
Psa 57:6 Which schal not here the vois of charmeris; and of a venym makere charmynge wiseli.
Psa 57:7 God schal al to-breke the teeth of hem in her mouth; the Lord schal breke togidere the greet teeth of liouns.
Psa 57:8 Thei schulen come to nouyt, as water rennynge awei; he bente his bouwe, til thei ben maad sijk.
Psa 57:9 As wexe that fletith awei, thei schulen be takun awei; fier felle aboue, and thei siyen not the sunne.
Psa 57:10 Bifore that youre thornes vndurstoden the ramne; he swolewith hem so in ire, as lyuynge men.
Psa 57:11 The iust man schal be glad, whanne he schal se veniaunce; he schal waische hise hondis in the blood of a synner.
Psa 57:12 And a man schal seie treuli, For fruyt is to a iust man; treuli God is demynge hem in erthe.
Psa 58:1 The title of the eiyte and fiftithe salm. `In Jeroms translacioun thus, To the ouercomer, that thou lese not Dauid, meke and simple, `whanne Saul sente and kepte the hous, to slee hym. `In Ebreu thus, To the ouercomyng, leese thou not the semeli song of Dauid, and so forth.
Psa 58:2 Mi God, delyuer thou me fro myn enemyes; and delyuer thou me fro hem that risen ayens me.
Psa 58:3 Delyuer thou me fro hem that worchen wickidnesse; and saue thou me fro menquelleris.
Psa 58:4 For lo! thei han take my soule; stronge men fellen in on me.
Psa 58:5 Nethir my wickidnesse, nether my synne; Lord, Y ran with out wickidnesse, and dresside `my werkis.
Psa 58:6 Rise vp thou in to my meetyng, and se; and thou, Lord God of vertues, art God of Israel. Yyue thou tent to visite alle folkis; do thou not merci to alle that worchen wickidnesse.
Psa 58:7 Thei schulen be turned at euentid, and thei as doggis schulen suffre hungir; and thei schulen cumpas the citee.
Psa 58:8 Lo! thei schulen speke in her mouth, and a swerd in her lippis; for who herde?
Psa 58:9 And thou, Lord, schalt scorne hem; thou schalt bringe alle folkis to nouyt.
Psa 58:10 I schal kepe my strengthe to thee;
Psa 58:11 for God is myn vptaker, my God, his mercy schal come byfore me.
Psa 58:12 God schewide to me on myn enemyes, slee thou not hem; lest ony tyme my puples foryete. Scatere thou hem in thi vertu; and, Lord, my defender, putte thou hem doun.
Psa 58:13 Putte thou doun the trespas of her mouth, and the word of her lippis; and be thei takun in her pride. And of cursyng and of leesyng; thei schulen be schewid in the endyng.
Psa 58:14 In the ire of ending, and thei schulen not be; and thei schulen wite, that the Lord schal be Lord of Jacob, and of the endis of erthe.
Psa 58:15 Thei schulen be turned at euentid, and thei as doggis schulen suffre hungur; and thei schulen cumpas the citee.
Psa 58:16 Thei schulen be scaterid abrood, for to eete; sotheli if thei ben not fillid, and thei schulen grutche.
Psa 58:17 But Y schal synge thi strengthe; and eerli Y schal enhaunse thi merci. For thou art maad myn vptaker; and my refuyt, in the dai of my tribulacioun.
Psa 58:18 Myn helper, Y schal synge to thee; for thou art God, myn vptaker, my God, my mercy.
Psa 59:1 The title of the nyne and fiftithe salm. `In Ebreu thus, To victorie, on the witnessyng of roose, the swete song of Dauid, to teche, `whanne he fauyte ayens Aram of floodis, and Sirie of Soba; and Joab turnede ayen, and smoot Edom in the `valei of salt pittis, twelue thousynde. `In Jeroms translacioun thus,
Psa 59:2 To the ouercomer for lilies, the witnessing of meke and parfit Dauid, to teche, whanne he fauyte ayens Sirie of Mesopotamye, and Soba, and so forth.
Psa 59:3 God, thou hast put awei vs, and thou hast distried vs; thou were wrooth, and thou hast do merci to vs.
Psa 59:4 Thou mouedist the erthe, and thou disturblidist it; make thou hool the sorewis therof, for it is moued.
Psa 59:5 Thou schewidist harde thingis to thi puple; thou yauest drynk to vs with the wyn of compunccioun.
Psa 59:6 Thou hast youe a signefiyng to hem that dreden thee; that thei fle fro the face of the bouwe. That thi derlyngis be delyuered;
Psa 59:7 make thou saaf with thi riyt hond `the puple of Israel, and here thou me.
Psa 59:8 God spak bi his hooli; Y schal be glad, and Y schal departe Siccimam, and Y schal meete the greet valei of tabernaclis.
Psa 59:9 Galaad is myn, and Manasses is myn; and Effraym is the strengthe of myn heed.
Psa 59:10 Juda is my king; Moab is the pot of myn hope. In to Idumee Y schal stretche forth my scho; aliens ben maad suget to me.
Psa 59:11 Who schal lede me in to a citee maad strong; who schal leede me til in to Ydumee?
Psa 59:12 Whether not thou, God, that hast put awei vs; and schalt thou not, God, go out in oure vertues?
Psa 59:13 Lord, yyue thou to vs help of tribulacioun; for the heelthe of man is veyn.
Psa 59:14 In God we schulen make vertu; and he schal bringe to nouyt hem that disturblen vs.
Psa 60:1 The titil of the sixtithe salm. To the victorie on orgun, to Dauid hym silf.
Psa 60:2 God, here thou my biseching; yyue thou tent to my preyer.
Psa 60:3 Fro the endis of the lond Y criede to thee; the while myn herte was angwischid, thou enhaunsidist me in a stoon.
Psa 60:4 Thou laddest me forth, for thou art maad myn hope; a tour of strengthe fro the face of the enemye.
Psa 60:5 I schal dwelle in thi tabernacle in to worldis; Y schal be keuered in the hilyng of thi wengis.
Psa 60:6 For thou, my God, hast herd my preier; thou hast youe eritage to hem that dreden thi name.
Psa 60:7 Thou schalt adde daies on the daies of the king; hise yeeris til in to the dai of generacioun and of generacioun.
Psa 60:8 He dwellith with outen ende in the siyt of God; who schal seke the merci and treuthe of hym?
Psa 60:9 So Y schal seie salm to thi name in to the world of world; that Y yelde my vowis fro dai in to dai.
Psa 61:1 The titil of the oon and sixtithe salm. To the victorie on Iditum, the salm of Dauid.
Psa 61:2 Whether my soule schal not be suget to God; for myn heelthe is of hym.
Psa 61:3 For whi he is bothe my God, and myn heelthe; my `taker vp, Y schal no more be moued.
Psa 61:4 Hou longe fallen ye on a man? alle ye sleen; as to a wal bowid, and a wal of stoon with out morter cast doun.
Psa 61:5 Netheles thei thouyten to putte awei my prijs, Y ran in thirst; with her mouth thei blessiden, and in her herte thei cursiden.
Psa 61:6 Netheles, my soule, be thou suget to God; for my pacience is of hym.
Psa 61:7 For he is my God, and my saueour; myn helpere, Y schal not passe out.
Psa 61:8 Myn helthe, and my glorie is in God; God is the yyuer of myn help, and myn hope is in God.
Psa 61:9 Al the gaderyng togidere of the puple, hope ye in God, schede ye out youre hertis bifore hym; God is oure helpere with outen ende.
Psa 61:10 Netheles the sones of men ben veyne; the sones of men ben liers in balauncis, that thei disseyue of vanytee in to the same thing.
Psa 61:11 Nile ye haue hope in wickidnesse, and nyle ye coueyte raueyns; if ritchessis be plenteuouse, nyle ye sette the herte therto.
Psa 61:12 God spak onys, Y herde these twei thingis, that power is of God, and, thou Lord, mercy is to thee;
Psa 61:13 for thou schalt yelde to ech man bi hise werkis.
Psa 62:1 The titil of the two and sixtithe salm. `The salm of Dauid, `whanne he was in the desert of Judee.
Psa 62:2 God, my God, Y wake to thee ful eerli. Mi soule thirstide to thee; my fleisch thirstide to thee ful many foold.
Psa 62:3 In a lond forsakun with out wei, and with out water, so Y apperide to thee in hooli; that Y schulde se thi vertu, and thi glorie.
Psa 62:4 For thi merci is betere than lyues; my lippis schulen herie thee.
Psa 62:5 So Y schal blesse thee in my lijf; and in thi name Y schal reise myn hondis.
Psa 62:6 Mi soule be fillid as with inner fatnesse and vttermere fatnesse; and my mouth schal herie with lippis of ful out ioiyng.
Psa 62:7 So Y hadde mynde on thee on my bed, in morewtidis Y shal thenke of thee;
Psa 62:8 for thou were myn helpere. And in the keueryng of thi wyngis Y schal make `ful out ioye, my soule cleuede after thee;
Psa 62:9 thi riythond took me vp.
Psa 62:10 Forsothe thei souyten in veyn my lijf, thei schulen entre in to the lower thingis of erthe;
Psa 62:11 thei schulen be bitakun in to the hondis of swerd, thei schulen be maad the partis of foxis.
Psa 62:12 But the king schal be glad in God; and alle men schulen be preysid that sweren in hym, for the mouth of hem, that speken wickid thingis, is stoppid.
Psa 63:1 The titil of the thre and sixtithe salm. `In Ebrewe thus, To the victorie, the salm of Dauid. `In Jerom `thus, To the ouercomer, the song of Dauid.
Psa 63:2 God, here thou my preier, whanne Y biseche; delyuere thou my soule fro the drede of the enemy.
Psa 63:3 Thou hast defendid me fro the couent of yuele doers; fro the multitude of hem that worchen wickidnesse.
Psa 63:4 For thei scharpiden her tungis as a swerd, thei benten a bowe, a bittir thing;
Psa 63:5 for to schete in priuetees hym that is vnwemmed.
Psa 63:6 Sodeynli thei schulen schete hym, and thei schulen not drede; thei maden stidefast to hem silf a wickid word. Thei telden, that thei schulden hide snaris; thei seiden, Who schal se hem?
Psa 63:7 Thei souyten wickidnessis; thei souyten, and failiden in sekinge. A man neiyhe to deep herte;
Psa 63:8 and God schal be enhaunsid. The arowis of `litle men ben maad the woundis of hem;
Psa 63:9 and the tungis of hem ben maad sijk ayens hem. Alle men ben disturblid, that sien hem;
Psa 63:10 and ech man dredde. And thei telden the werkis of God; and vndurstoden the dedis of God.
Psa 63:11 The iust man schal be glad in the Lord, and schal hope in hym; and alle men of riytful herte schulen be preisid.
Psa 64:1 The titil of the foure and sixtithe salm. `To victorie, `the salm of the song of Dauid.
Psa 64:2 God, heriyng bicometh thee in Syon; and a vow schal be yolden to thee in Jerusalem.
Psa 64:3 Here thou my preier; ech man schal come to thee.
Psa 64:4 The wordis of wickid men hadden the maistrye ouer vs; and thou schalt do merci to oure wickidnessis.
Psa 64:5 Blessid is he, whom thou hast chose, and hast take; he schal dwelle in thin hallis. We schulen be fillid with the goodis of thin hous;
Psa 64:6 thi temple is hooli, wondurful in equite. God, oure heelthe, here thou vs; thou art hope of alle coostis of erthe, and in the see afer.
Psa 64:7 And thou makest redi hillis in thi vertu, and art gird with power;
Psa 64:8 which disturblist the depthe of the see, the soun of the wawis therof.
Psa 64:9 Folkis schulen be disturblid, and thei that dwellen in the endis schulen drede of thi signes; thou schalt delite the outgoingis of the morewtid and euentid.
Psa 64:10 Thou hast visitid the lond, and hast greetli fillid it; thou hast multiplied to make it riche. The flood of God was fillid with watris; thou madist redi the mete of hem, for the makyng redi therof is so.
Psa 64:11 Thou fillynge greetli the stremes therof, multiplie the fruytis therof; the lond bringinge forth fruytis schal be glad in goteris of it.
Psa 64:12 Thou schalt blesse the coroun of the yeer of thi good wille; and thi feeldis schulen be fillid with plentee of fruytis.
Psa 64:13 The feire thingis of desert schulen wexe fatte; and litle hillis schulen be cumpassid with ful out ioiyng.
Psa 64:14 The wetheris of scheep ben clothid, and valeis schulen be plenteuouse of wheete; thei schulen crye, and sotheli thei schulen seye salm.
Psa 65:1 The titil of the fyue and sixtithe salm. To the victorie, the song of salm.
Psa 65:2 Al the erthe, make ye ioie hertli to God, seie ye salm to his name; yyue ye glorie to his heriyng.
Psa 65:3 Seie ye to God, Lord, thi werkis ben dredeful; in the multitude of thi vertu thin enemyes schulen lie to thee.
Psa 65:4 God, al the erthe worschipe thee, and synge to thee; seie it salm to thi name.
Psa 65:5 Come ye and se ye the werkis of God; ferdful in counseils on the sones of men.
Psa 65:6 Which turnede the see in to drie lond; in the flood thei schulen passe with foot, there we schulen be glad in hym.
Psa 65:7 Which is Lord in his vertu withouten ende, hise iyen biholden on folkis; thei that maken scharp be not enhaunsid in hem silf.
Psa 65:8 Ye hethen men, blesse oure God; and make ye herd the vois of his preising.
Psa 65:9 That hath set my soule to lijf, and yaf not my feet in to stiryng.
Psa 65:10 For thou, God, hast preued vs; thou hast examyned vs bi fier, as siluer is examyned.
Psa 65:11 Thou leddist vs in to a snare, thou puttidist tribulaciouns in oure bak;
Psa 65:12 thou settidist men on oure heedis. We passiden bi fier and water; and thou leddist vs out in to refreschyng.
Psa 65:13 I schal entre in to thin hous in brent sacrifices; Y schal yelde to thee my vowis,
Psa 65:14 which my lippis spaken distinctly. And my mouth spake in my tribulacioun;
Psa 65:15 Y shal offre to thee brent sacrificis ful of merowy, with the brennyng of rammes; Y schal offre to thee oxis with buckis of geet.
Psa 65:16 Alle ye that dreden God, come and here, and Y schal telle; hou grete thingis he hath do to my soule.
Psa 65:17 I criede to hym with my mouth; and Y ioyede fulli vndir my tunge.
Psa 65:18 If Y bihelde wickidnesse in myn herte; the Lord schal not here.
Psa 65:19 Therfor God herde; and perseyuede the vois of my bisechyng.
Psa 65:20 Blessid be God; that remeued not my preyer, and `took not awei his merci fro me.
Psa 66:1 The titil of the sixe and sixtithe salm. `In Ebreu thus, To the victorie in orguns, the salm of the song. `In Jerom `thus, To the ouercomer in salmes, the song of writing of a delitable thing with metre.
Psa 66:2 God haue merci on vs, and blesse vs; liytne he his cheer on vs, and haue merci on vs.
Psa 66:3 That we knowe thi weie on erthe; thin heelthe in alle folkis.
Psa 66:4 God, puplis knowleche to thee; alle puplis knouleche to thee.
Psa 66:5 Hethen men be glad, and make fulli ioye, for thou demest puplis in equite; and dressist hethene men in erthe.
Psa 66:6 God, puplis knouleche to thee, alle puplis knouleche to thee;
Psa 66:7 the erthe yaf his fruyt. God, oure God blesse vs, God blesse vs; and alle the coostis of erthe drede hym.
Psa 67:1 The titil of the seuene and sixtithe salm. To the victorie, the salm `of the song `of Dauid.
Psa 67:2 God rise vp, and hise enemyes be scaterid; and thei that haten hym f
